د افغانستان او انګلستان له کرېکټ لوبې وروسته 'کلاسیک' هنري اثر لیلامېږي
د عکس سرچینه، SOTHEBY'S
د کرېکټ نړیوال جام په ترڅ کې به د افغانستان او انګلستان تر لوبې وروسته د ایل ایس لورې یو هنري شاهکار چې ماشومان پکې د کرېکټ لوبې حال کې لیدل کېږي، له لیلامۍ مخکې نندارې ته وړاندې کېږي. منتظیمن تمه کوي چې دغه انځور به د ۸۰۰ زره پاونډو پورې بیه ومومي.
دغه نایابه پنځونه چې لږ کسانو لیدلی، د کرېکټ نړیوال جام پر مهال لندن کې پلور ته وړاندې کېږي او دا مهال د هنري پنځونو ټولونکو نیل او ګینا سمیت ملکیت دی.
د جون پر ۱۸ نېټه به دغه انځور د افغانستان او انګلستان تر منځ په اولډ ټرېفډ کرېکټ لوبغالي کې له سیالۍ وروسته د لورې پلرنۍ سیمه سټرېټفرډ کې پلور ته وړاندې شي.
دغه تصویر لومړی ځل ۱۹۹۶ کال کې د ۲۸۲ زره پاونډو بدل کې وپلورل شو، چې دا د نوموړي هنرمند د یوه انځور لپاره تر ټولو لوړه بیه وه. تصویر به له لیلامۍ مخکې د پنځو ورځو لپاره د لندن سالفورډ ګالرۍ کې نندارې ته ایښی وي.
د معاصر برتانوي هنرونو یو ماهر سایمن هیوکر وايي: دغه انځور د ډېرو دلیلونو له کبله یو کلاسیک دی. لورې د شلمې پېړۍ پیل کې د شمال صنعتي ښارونو سخت حالت انځوروي او بیا دغه انځور کې د کرېکټ لوبه کې د ماشومانو ګډون ننداره دغه انځور تر ډېره حده بې ساري کوي.
د سوتهبې هنري اثارو لیلامۍ ادارې یوه ویانده وايي، لورې په خپلو اثارو کې د کرېکټ خورا کمه انځور ګري کړې او یوازې د یوې رسمي سیالۍ انځور یې په اثارو کې وینو. د ۱۹۳۸ کال کې انځور شوی (یوه کرېکټ لوبه) انځور به د جون له ۱۴ تر ۱۷ نېټې پورې نندارې ته وړاندې شي.
د عکس سرچینه، PA
ماهرین وايي، تمه کېږي چې دغه تصویر به د اته سوه زره او یو اعشاریه دوه میلیون پاونډو تر منځ ارزښت ومومي.
د همدې انځور ګر یو بل اثر چې ( د فوټبال لوبه) نوم ورکړل شوی، ۲۰۱۱ کال کې د پنځه اعشاریه شپږ میلیونو پاونډو بدل کې پلورل شوی دی او دا تر اوسه د یاد انځور ګر د یوه انځور لپاره تر ټولو لوړه بیه بلل کېږي.
ایل ایس لورې ۱۸۸۷ کال کې د برتانیا په مانچسټر کې زېږېدلی و او په خپلو اثارو کې د کارګر قشر انځورولو له کبله ډېر مشهور و. لورې داسې حال کې هنرونه ولوستل چې د ورځې لخوا به یې کرایه ټولوله.
لومړي سر کې نوموړي د انځورګرۍ لپاره کومه اسانتیا هم نه درلودله او ان له کوره بهر به یې د کاغذ پر ټوټو هم انځورونه کښل. نوموړی لومړی ځل ۱۹۳۹ کال کې لندن کې د خپلو انځورونو یو ځانګړی نندارتون جوړ کړ او له هغه ځایه د هېواد په کچه مشهور شو.
لورې د ۸۸ کلونو په عمر ۱۹۷۶ کال کې لندن کې څو میاشتې له هغه مخکې ومړ چې ټاکل شوې وه، شاهي اکاډیمۍ کې یې انځورونه یوه نندارتون کې وړاندې شي.
