د هالنډ روټرډام کې د ډزو دوه جلا پېښې؛ درې کسان وژل شوي
هالنډي پولیسو ویلي په وسله سمبال یو تن یې نیولی چې د روټرډام ښار د ډزو په دوو جلا پېښو کې یې درې تنه وژلي دي.
د پولیسو د اعلان له مخې، یوه ۳۲ کلن بریدګر سړي د پنجشنبې په ورځ لومړی په یوه کور کې ډزې کړې، کور ته یې اور ورته کړی او بیا یې د اراسموسن په نامه پر طبي مرکز برید کړی دی.
د لومړي برید په وژل شویو کې یوه ۳۹ کلنه ښځه او د هغې ۱۴ کلنه لور هم دي او په دویم برید کې ۴۳ کلن سړی وژل شوی دی.
د بریدګر له نیول کېدا وړاندې پولیسو ویلي وو چې بریدګر د دنګې ونې او اوږدو وېښتانو لرونکی سړی دی.
د برید له ځایه خپرو شویو انځورونو کې ښکاري چې یو سړی پوځي جامې لري او لاس تړلی د پولیسو ګاډي ته بېول کېږي.
پولیسو د بریدګر له نوم اخیستو پرته هغه د اراسموسن پوهنتون محصل بللی دی.
د عکس سرچینه، EPA
هغه طبي مرکز چې ده برید پرې کړی، د یاد پوهنتون اړوند مرکز دی.
تر اوسه د یاد برید د انګیزې او لامل په اړه څه نه دي ویل شوي، خو پولیسو ویلي چې ښايي بریدګر به دا برید د نورو کسانو په مرسته کړی وي.
د روټرډام پولیسو ویلي یاد سړی دوه کاله وړاندې په حیوان ځورونه هم تورن شوی و.
د اراسموسن په طبي مرکز کې یوه محصل ویلي، بریدګر تر څلورو-پنځو ډزو وروسته پر دغه روزنیز مرکز یو چاودېدونکی څیز هم ور غورځولی دی.
