د اسلام اباد پولیسو علي وزیر او ایمان مزاري نیولي دي
د عکس سرچینه، Social Media
د پاکستان پلازمېنه اسلام اباد کې پولیسو د پښتون ژغورنې غورځنګ یو مهم غړی علي وزیر او د بشري حقونو فعاله ایمان مزاري نیولي دي.
علي وزیر د پاکستان قامي اسمبلې کې د شمالي وزیرستان پخوانی استازی دی، او تر دې مخکې هم څو ځله نیول شوی او تر دوه کلونو ډېر بند یې تېر کړی دی.
د اسلام اباد پولیسو لخوا خپاره شوي بیان کې د علي وزیر او ایمان مزاري د نیول کېدو پخلی شوی دی.
په بیان کې راغلي "دواړه ملزمان د اسلام اباد پولیسو ته ته څېړنو لپاره مطلوب وو" او دا چې د دوی خلاف به ټول ګامونه د قانون له مخې اخیستل کېږي.
خو پولیسو د دوی د قضیو وضاحت نه دی کړی.
د یادونې ده چې د پښتون ژغورنې غورځنګ یا 'پيټياېم' اوړمه ورځ اسلام اباد کې یوه ستره ولسي غونډه جوړه کړې وه، چې ایمان مزاري هم پکې برخه اخیستې او وینا کړې وه.
د پښتون ژغورنې غورځنګ مشرانو دغه جلسه د اسلام اباد زړه کې پلان کړې وه خو د پولیسو لخوا دغلته پر غونډو او راټولېدنو تر بندیز یا د ۱۴۴ دفعې له اعلان وروسته دا اعتراضیه جلسه د اسلام اباد په ترنول کې وشوه.
د پښتون ژغورنې غورځنګ یوه مشر محسن دوړ پر ټویټر لیکلي چې د علي وزیر او ایمان مزاري نیول او د پيټياېم ځپل ډېر شرموونکی عمل دی. مخالفت جرم نه دی. د دولت په ملاتړ هغه جګړې چې زموږ پر خاوره تحمیل شوې جرم نه ګڼل کېږي، خو ددغو جنګي پروژو افشا کول جنګي جنایت ګڼل کېږي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
تر دې جلسې وروسته د پولیسو لخوا په ترنول تاڼه کې د پيټيایم د ځينو غړو خلاف قضیه درج شوې وه.
هغه مهال رپوټونو کې دا هم راغلي وو چې د پيټياېم ګڼ غړي او پلویان د اسلام اباد جلسې ته پر لار نیول شوي دي.
د اسلام اباد پولیسو یوه چارواکي د بيبيسي اردو شهزاد ملک ته ویلي چې د ایمان مزاري او علي وزیر پر ضد د ادارو خلاف د څرګندونو او همدا راز د ادارو خلاف د خلکو د راپارولو قضیه ثبت شوې ده.
اغلې مزاري چې د پاکستان د بشري حقونو پخوانۍ وزیرې شیرین مزاري لور ده، په دې جلسه کې پر پوځ توندې نیوکې کړې وې.
پخپله شیرین مزاري هم چې په دې وروستیو کې یې د عمران خان له تحریک انصاف ګونده د وتلو اعلان وکړ، پاکستان کې د مې نهمې له تاوتریخوالي ډکو احتجاجونو وروسته نیول شوې وه.
ایمان مزاري هغه مهال د خپلې مور د نیول کېدو پړه هم پر پوځ اچولې وه او له دې کبله یې پر خلاف مقدمه هم ثبت شوې وه چې وروسته د اسلام اباد د لوړې محکمې مشر ختمه کړه.
