یوه اوونۍ کې د درېیو کسانو قصاص؛ طالبان وایي جوزجان کې یې یو کس "قصاص" کړی
د عکس سرچینه، SOCIAL/MEDIA
د طالبانو سترې محکمې له خوا په یوې خپرې شوې اعلامیې کې ویل شوي، "په جوزجان ولایت کې پر یوه قاتل د قصاص حکم عملي شو."
په اعلامیه کې د قاتل نوم نظر محمد یاد شوی، چې د فاریاب ولایت د بلچراغ ولسوالۍ اصلي اوسېدونکی و او د طالب چارواکو په وینا "په جوزجان کې اوسېده او څه باندې دوه کاله وړاندې یې یو کس په چاقو وژلی و."
د طالبانو سترې محکمې ویلي، یاده موضوع د درې ګونو محکمو "ابتداییه، مرافعه او تمیز" له خوا په دقیق او مکرر ډول ارزول شوې چې په پایله کې یې د "قصاص" حکم صادر او تائید شو.
اعلامیه زیاتوي، دغه قضیه د طالبانو مشر ته د تائید لپاره استول شوې وه، چې په پایله کې پر قاتل د "قصاص شرعي حکم" د پلي کولو امر ورکړل شو.
"دغه د قصاص حکم نن دوشنبه د ۱۴۴۵ هجري قمري کال د شعبان المعظم میاشتې په ۱۵ نېټه د جوزجان ولایت په مرکز شبرغان ښار ورزشي سټډیم کې د هېوادوالو په یوه مجموعه کې تطبیق شو."
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د طالبانو د سترې محکمې د عامه اړیکو مرستیال عبدالواحد حقاني بيبيسي پښتو پاڼې ته وویل، تورن کس د "مقتول د ورور په ډزو وژل شوی دی."
یوازې څلور ورځې مخکې د طالبانو حکومت ویلي و، چې په غزني ولایت کې یې پر دوو کسانو د "قصاص" حکم پلی کړی دی.
پر هغو کسانو د قصاص حکم د پنجشنبه په ورځ د غزني په مرکز کې د علي لالا کلي د فوټبال په لوبغالي کې د طالبانو حکومت د ځینو چارواکو او ګڼ شمېر عامو خلکو په حضور کې پلی شوی و.
خو په افغانستان کې د ملګرو ملتونو استازولۍ (یوناما) دا چاره د ژوند له بنسټیز حق سره متضاده بللې وه.
یوناما په ټویټر پیغام کې ویلي و: ''یوناما (د افغانستان) له واکمنو چارواکو غواړي، چې د اعدام سزا سملاسي ودروي او له دې سره د دې (سزا) د ختمولو پر لور ګام واخلي.''
د شمېرو له مخې د طالبانو محاکمو یوازې تېر کال د قصاص ۱۷۵، د سنګسار ۳۷ او دیوال لاندې کولو ۴ حکمونه صادر کړي وو.
د طالبانو سترې محکمې د تېر کال جون میاشت په لغمان کې هم یو کس "د څو قتلونو په جرم" قصاص کړی و.
تر هغې ورمخکې په لومړي ځل فراه کې د طالبانو له خوا پر یوه سړي د قصاص حکم جاري شوی او په عام محضر کې په ډزو وېشتل شوی و چې د نړیوالو سخت غبرګونونه یې راوپارول.
هغه مهال د بشري حقونو سازمانونو او لویدیزو هېوادونو دا یو "غیر انساني عمل" یاد کړی و.
خو د طالبانو ویاند ذبیح الله مجاهد بیا په عام محضر کې د سزا ورکولو په هکله د بشري حقونو سازمانونو او لوېدیزو هېوادونو نیوکې ''د اسلام دین ته بې احترامي'' بللې وه.
