تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
بېروت کې د اسرائیل برید؛ د لبنان حکومت "جرمي عمل" او "څرګنده سرغړونه" بللې
اسرائيل وايي هوايي ځواکونو یې د لبنان د پلازمېنې بېروت سویل کې د حزبالله د یوه مهم قوماندان په نښه کولو لپاره برید کړی دی.
د اسرائیل پوځ ویلي، د حزبالله دغه قوماندان دوه ورځې وړاندې د اشغال شوې جولان لوړو په مجدل شمس سیمه کې د ترسره شوي راکټي برید مسوول و.
اسرائیل که څه هم نیغ نیغه د دغه قوماندان نوم نه دی اخیستی، خو د رویټرز او فرانسې خبرې اژانسونو په ګډون د بېلابېلو رسنیو رپوټونو کې ویل شوي چې هدف 'فواد شکر' و، خو هغه ترې ژوندی وتلی دی.
د ښاغلي شکر په اړه ویل کېږي چې د امریکا متحد ایالتونه یې د حزبالله د مشر سید حسن نصرالله ستر پوځي سلاکار ګڼي.
ویل کېږي هغه سوریه کې د بشار اسد د حکومت په ملاتړ جګړه کې فعال حضور درلود.
متحد ایالتونه هغه په ۱۹۸۳ کال بیروت کې د امریکايي ځواکونو پر مرکز د چاودنې، چې ۲۴۱ امریکايي سرتېري پې وژلي وو، اصلي لوبغاړی معروفي کوي.
واشنګټن د هغه په تړاو د مالومات بدل کې ۵ میلیون ډالره جایزه هم اعلان کړې ده.
پر مجدل شمس برید کې ۱۲ ماشومان او تنکي ځوانان وژل شوي وو.
دا برید د بېروت د سویل په ضاحیه سیمه کې شوی، چې د حزبالله حضور پکې پیاوړی دی او اسرائیل سره مخکینې جګړه کې هم تر ډېره ویجاړه شوې وه.
د لبنان لومړي وزیر نجیب میقاتي دا "جرمي عمل" او د لبنان پر خاوره د اسرائیل "څرګند تېری" بللی دی.
تر دې لږ ور مخکې د لبنان بهرنیو چارو وزیر عبدالله بوحبیب ویلي وو چې حکومت یې ملګرو ملتونو ته د شکایت پلان لري.
هغه له رویټرز خبري اژانس سره خبرو کې هیله څرګنده کړې وه چې که حزبالله دغه برید ته کوم غبرګون ښيي، نو د کړکېچ د ډېرېدو لامل نه شي.
اسرائیل څه وايي؟
پر خواله رسنیو خپرو شویو تصویرونو کې ښکاري چې په بیروت برید کې یوه څو پوړیزه ودانۍ په نښه شوې ده.
تصویرونو کې ښکاري چې د دې ودانۍ یوه برخه نړېدلې او لوګي ترې پورته کېږي.
د اسرائیل دفاع وزیر یواف ګالانت بېروت کې د چاودنې غږ تر اورېدل کېدو څو دقیقې وروسته د خواله رسنیو یوه پیغام کې ولیکل "حزبالله له سرې کرښې اوښتی و."
د دغه برید په تړاو د رپوټونو له خپریدو سملاسي وروسته سپینې ماڼۍ وویل د اسرائیل او حزبالله ترمنځ د تمام عیاره جګړې مخه نیول کېدای شي.
د سپېنې ماڼۍ ویاندې یوې خبري غونډې ته ویلي، د واشنګټن دریځ دا دی چې د حزبالله او اسرائیل لخوا له جګړې ډډه وشي.
