عبد الصمد روحاني له هلمنده

	راپورونه وايي چې خپله ځايي خلک تر اوسه کورونو ته د ستنېدلو لپاره زړۀ نه ښه کوي او لاهم د جگړې وېره لري

والي اسدالله وفا وويل چې په ولسوالۍ كې به ډېر ژر حكومتي اداره په كار پيل وكړي .

خوبل پلو له دغې ولسوالۍ څخه رارسيدلي خبرونه وايي چې ځايي خلک لا خپلو كورنوته نه دي ستانه شوي او تر اوسه زړۀ نا زړۀ دي .

دغه ولسوالۍ دوه اوونۍ وړاندې افغان اوناټو ځواكونو له وسله والو طالبانو څخه ونيوله.

كه له يوه لورې د هلمند چارواكي په موسى كلا ولسوالۍ كې دحالاتو دسموالي خبره كوي، خو بل پلو ګڼ كسان چې وايي دموسى كلا ولسوالۍ مېشت وګړي دي وايي چې په ولسوالۍ كې يې حالات سم نه دي .

په موسى كلا كې اوس وضعه عادې شوې او ولسي وګړي خپلو كورونو ته د ستنېدو په حال كې دي. موږ به ډېرژر هلته دبيارغاونې پروژې پيل كړو د هلمند والي اسد الله وفا

ځايي خلك وايي چې هله به ستنېدو ته زړه ښه كړي چې ولسوالۍ يې په ټوليز ډول دوسله والو طالبانو له شتون څخه پاكه شي او بيا د جگړې د اور د بلېدو وېره نه وي.

يوشمېركسان په ولسوالۍ كې دنړيوالو ځواكونو له ناسم چلند څخه هم سرټكوي. دوى وايي چې نړيوال ځواكونه يې په خپلسري ډول كورونوته ورځي .

ددغو انديښنو په اړه چې مو كله د هلمند دوالي اسدالله وفا غبرګون وپوښت، هغه وويل: ''په موسى كلا كې اوس وضعه عادې شوې او ولسي وګړي خپلو كورونو ته د ستنېدو په حال كې دي. موږ به ډېرژر هلته دبيارغاونې پروژې پيل كړو. خلك زما څخه غوښتنه لري چې دپروژو كار بايد دهغه ځاي خلک وكړي. موسى كلا به ډېر ژر تصفيه شي.''

موسى كلا د هلمندپه شمال كې پرته ولسوالۍ ده اوشاوخوا دوې اوونۍ وړاندې افغان اوناټو ځواكونو له وسله والو طالبانو څخه ونيوله .