کندهار کې افغان سرتېري دوه ناټو عسکر وژلي

ناټو وايي، د افغانستان په سوېلي کندهار ولایت کې دوو افغان سرتېرو د ناټو دوه رومانیايي سرتېري د روزنې پرمهال په ډزو وژلي او یو بل یې ټپی کړی دی.

برید کوونکي هم وژل شوي. د رومانیا د دفاع وزارت چارواکو ویلي، وژل شوي د رومانیا د ځانګړو ځواکونو سرتېري دي.

برید کندهار ښار کې د پوځي روزنې پرمهال شوی دی.

په وروستیو کلونو کې پر بهرنیو ځواکونو د افغان ځواکونو په یونیفورم کې ګڼ بریدونه شوي دي.

پر بهرنیو ځواکونو د افغان سرتېرو بریدونه 'زرغون پر آبي' بریدونه بلل شوي، چې معمولاً پکې د طالبانو غړي او یا ملاتړي پر بهرنیو ځواکونو د وسلو خولې ور اړوي.

ناټو ځواکونو په یوه خبرپاڼه کې ویلي، دواړه برید کوونکي هم د شنبې په ورځ وژل شوي او د پېښې په اړه څېړنه پیل شوې ده.

ویل کېږي چې د پېښې په تړاو یو افغان پولیس نیول شوی او اوس پوښتنې ګروېږنې ترې روانې دي.

د برید پړه وسله والو طالبانو منلې ده. ددغې ډلې یوه ویاند ذبیح الله مجاهد وايي، ''د کندهار پر هوايي ډګر د یوه با احساسه عسکر په برید کې د ناټو ۴ عسکر مړه او ژوبل شول''.

دا وروستی برید داسې مهال شوی، چې د ناتو ځواکونو قومندان جنرال جان نیکولسن په افغانستان کې د امریکايي ځواکونو د شمېر د کمولو پر پلان کار کوي، چې ویل کېږي راتلونکی کال به افغانستان کې د امریکايي ځواکونو شمېر ۵۰ سلنه کم شي.

د ناټو په ویناپاڼه کې راغلي، دا وروستی برید به د دوی د روزنې بهیر او د افغان ځواکونو د سلامشورې چارې ټکنۍ نه کړي.

رومانیا په افغانستان کې د قاطع ماموریت د ملاتړ ټول ټال ۱۲۵۰۰ سرتېرو په چوکاټ کې نژدې ۶۰۰ سرتېري لري.

په پام کې ده، چې تر ۲۰۱۷ کال پورې افغانستان کې د امریکايي سرتېرو شمېر له ۹۸۰۰ نه ۵۵۰۰ ته راټیټ شي، خو داسې انګیرنې هم شته چې جنرال نیکولسن شاید د پوځيانو د کمولو چاره کې ځنډ غوښتنه وکړي، چې په دې سره وکړای شي د روزنې بهیر روان وساتلی شي.