د کابل ـ کندهار لویه لار د دویمې ورځې لپاره تړلې پاتې ده

د غزني ولایت سیمه ییز چارواکي وايي، له طالبانو سره د افغان ځواکونو د نښتې له کبله د کابل – کندهار لویه لاره د دویمې ورځې لپاره هم د طالبانو له خوا تړلې پاتې ده.

د غزني مرستیال والي محمد علي محمدي بي بي سي ته وویل، د غزني ښار او اندړو ولسوالۍ اړوندو ''شهباز'' او ''ناني'' سیمو کې لاهم جګړه روانه ده.

سرچینه ادعا کوي‎، طالبانو په دغو سیمو کې د ماینونو اېښودو سربېره، د لارې په اوږدو کې کچني پلچکونه هم الوځولي دي.

ښاغلی محمدي زیاتوي، دولت د لارې د خلاصون لپاره له احتیاطه کار اخلي.

سیمه ییز چارواکي وايي، غزني ته تازه دمي ځواکونه رسېدلي دي.

د ښاغلي احمدي په وینا، د تېرې ورځې په نښتو کې د یوې ښځې په ګډون پنځه ولسي وګړي وژل شوي او پنځه نور ټپیان شوي دي.

تېره شپه هم بې پيلوټه الوتکو په شهاز سیمه کې بریدونه وکړل، چې د ځینو رپوټونو په حواله، د طالبانو ۲۰ اړوند کسان پکې ووژل شول.

احمدي وايي، په تېرو دوو ورځو کې د طالبانو تلفات ۶۷ کسانو ته رسېږي، خو د ټپیانو شمېر یې ۴۱ کسان دی.

طالبانو په دې اړه تر اوسه څه نه دي ویلي.

تېره ورځ وسله والو طالبانو وویل، د ''عزم'' په نامه عملیاتو کې یې مازدیګر د غزني ښار د ننه په ۵ مه حوزه برید کړی چې په وینا یې ۱ ټانک پکې ویجاړ ۷ پولیس وژل شوي، خو دا خبره تر اوسه چا نه ده تیید کړې.

د دوشنبې په ګهیځ (تله ۲۰مه) طالبانو د غزني پر ښار له دوو خواوو بریدونه وکړل.

د پولیسو مشر

تېره ورځ، ولسمشر محمد اشرف غني امین الله امرخېل د غزني د نوي امنیه قومندان په توګه وټاکه.

د غزني مخکینی امنیه قومندان محمد حکیم انګار ایله درې میاشتې وړاندې د دغه ولایت امنیه قومندان ټاکل شوی و.

ښاغلي غني د څلورو نورو ولایتونو (نورستان، سرپل، لغمان او بادغیس) لپاره هم نوي امنیه قومندانان ګومارلي دي.