د آریانا افغان بوینګ ۷۲۷ الوتکې د لوېدو ۴۵ کالیزه
د جنورۍ پنځمه د آريانا افغان هوايي شرکت د بوينگ ٧٢٧ الوتکې د لوېدو له پنځه څلوېښتمې کاليزې سره برابره ده.
د ١٩٦٩ کال د جنورۍ پنځمه هم د نن په څېر د يکشنبې ورځ وه.
د آريانا شرکت الوتکه چې ٦٢ تنه پکې سپاره وو، لندن ته څېرمه د گټويک هوايي ډگر ته د سهار په يوه بجه او پنځه دېرشو دقيقو راورسېده.
دغه مهال د هوايي ډگر شاوخوا سيمه سختو لړو پوښلې وه او د پيلوټ په تېروتنه الوتکه د خپلې د کوزېدو له مجازې زاويې نه ډېره ټيټه شوه او له ختيځې خوا نه هوايي ډگر ته له نژدې کېدو سره سم له ونو سره ولگېده.
په نتيجه کې د الوتکې ولکه له لاسه ووته او فيرن هيل ته څېرمه په کروندو کې راولوېده.
هوايي ډگر ته يې لا هم نژدې دوه نيم کيلومتره واټن پاتې و.
الوتکه د لوېدو پر مهال له يوه لوى کور سره ولگېده او اور يې واخيست.
په دې پېښه کې د الوتکې ٤٨ سپرلۍ او د عملې کارکوونکي ووژل شول.
دغه راز د لگېدلي کور دوو اوسېدونکو هم خپل ژوند له لاسه ورکړ.
د الوتکې پيلوټ، د الوتنې لومړى افسر، د الوتنې انجينر، او يوولس سپرلۍ ژوندۍ وتلې وې.
دغې پېښې په کور دننه د محمد ظاهرشاه د حکومت خلاف د کيڼو گوندونو اعتراضونه راوپارول.
هغوى تور لگاوه چې په خورا ډېرو پيسو د بېوزلي افغانستان لپاره پېرودل شوې الوتکه، گواکې له تخنيکي پلوه سمه نه وه او ځکه ولوېده.
هغه مهال چې د شوروي او امريکا ترمنځ د سړې جگړې پېر و، کيڼو گوندونو دا د هغوى په وينا د امپريالستي تخينک د کمزورتيا نښه بلله او له حکومته يې غوښتل جې له دې وروسته د الوتکو د پېر تړونونه له شورويانو سره وکړي.
هغه مهال د آريانا شرکت له امريکن ايرلاين سره په گډه چلېده او خدمات يې تر نن خورا ښه و.
