د فرانسوي عسکرو قاتل افغان سرتیری په مرګ محکوم شو
د عکس سرچینه، BBC World Service
- Author, جعفر هاند
- دنده, کابل
په کابل کې یوې نظامي محکمې هغه افغان سرتیري ته د مرګ سزا ورکړه چې، د روان میلادي کال په لومړۍ میاشت کې په کاپیسا کې څلور فرانسوي سرتیري په ډزو ووژل او ۱۸ نور یې ژوبل کړل.
د ژوبلو سرتېرو يوه يې بيا په فرانسه کې په روغتون کې ساه ورکړه.
د افغانستان د دفاع وزارت مرستیال ویاند دولت وزیري بي بي سي ته وویل، محکمه پرون (دوشنبه، جولای ۱۶) د څرخي پله په زندان کې ترسره شوه.
محکمې پخواني افغان سرتیري عبدالصبور ته چې د فرانسوي سرتيرو په وژنه تورن و، د مرګ سزا واوروله.
دا لومړنۍ محکمه ده او ښاغلی صبور د استیناف محکمې ته د اپیل کولو حق لري.
عبدالصبور د ۲۰۱۲ کال د جنورۍ په ۲۰مه افغان سرتیرو ته د روزنې پر مهال له فرانسوي سرتیرو سره تر یوې لفظې شخړې وروسته پر هغوی د ټوپک خوله ور واړوله.
له دغه برید وروسته د فرانسې مخکني ولسمشر نیکولای ساغکوزي په سملاسي ډول له افغانستان څخه د خپلو سرتیرو د ویستلو نېټه اعلان کړه.
وړاندې د ښاغلي صبور پلار بي بي سي ته ویلي و چې، زوی یې پر دماغي رنځ اخته و.
خو د دفاع وزارت مرستيال وياند وايي طبي ازموينو ښوولې چې عبدالصبور دماغي ستونزه، نه لرله.
