د طالبانو او ایراني ځواکونو ترمنځ نیمروز کې پر ګډه پوله وسلواله نښته پای ته رسېدلې
د عکس سرچینه، Getty Images
افغان طالبانو او ایراني تائید کړې ده چې چارشنبه نیمروز ولایت کې له ایران سره پر ګډه پوله د طالبانو او ایراني ځواکونو ترمنځ وسلواله نښته ختمه شوې ده.
د طالبانو ویاند ذبیح الله مجاهد په یوه لنډه اعلامیه کې ویلي، نښته د ناسم پوهاوي له کبله رامنځته شوې، خو د دواړو خواو لخوا په همغږۍ ختمه شوې ده.
په کابل کې د ایران سفارت د ایران د بهرنیو چارو وزارت د ویاند سعید خطیب زاده له قوله ویلي، پر ګډه پوله د دواړو خواو ترمنځ د اختلاف له امله نښته شوې، خو د دواړو لوریو په همغږۍ ختمه شوې ده.
ایراني چارواکو یا افغان طالبانو لا وضاحت نه دی کړی چې دا اختلاف پر څه موضوع رامنځته شوی دی.
د تسنیم خبري اژانس، چې د ایران 'سپاه پاسداران' ډلې ته نږدې بلل کېږي، دا خبر تائید کړ او وایي، نښته د 'شغالیک' سیمه کې رامنځته شوې ده.
ځینې ناتائید شوي رپوټونه وایي چې دې نښته کې ایراني ځواکونو ته مرګژوبله هم اوښتې، همدا راز د اماج خبري شبکې ادعا کړې د چې له دې نښتې وروسته یو شمېر ایراني ځواکونه د طالبانو لخوا نیول شوي دي، خو تر اوسه خپلواکو سرچینو دا ادعاوې نه دي تائید کړې.
اماج نیوز همدا راز یوه ویډیو هم خپره کړې او وایي چې د پېښې د صحنې ویډیو ده.
په دې ویډیو کې نامالوم کسان په بلوڅي ژبه غږېږي او وایي، "طالبانو ډزې کړې دي- دوست محمد پوسته یې نیولې، سیاه چم پوسته یې نیولې".
خو د تسنیم خبري اژانس وایي، د ایراني ځواکونو هېڅ کومه پوسته د افغان طالبانو لخوا نه ده نیولې شوې.
د افغانستان نیمروز ولایت د ایران له سیستان-بلوچستان سره پر ګډه پوله پروت دی.
پر دغه پوله د انساني قاچاق ترڅنګ د نشه یي توکو قاچاق هم کېږي او همدا راز د افغانستان د هلمند او هریردو سیندونو اوبه هم له همدې سیمې ایران ته داخلېږي.
په سیمه کې وچکالي، د اوبو کمښت او د قاچاقبرو فعالیتونه هغه ستونزې دي چې له کبله یې پخوا هم د دواړو هېوادونو وسلوالو ځواکونو ترمنځ د تاوتریخوالي سبب شوې دي.
