هلمند کې جګړه شپږمې ورځې ته وغځېده
د عکس سرچینه، EPA
- Author, مامون درانی
- دنده, بي بي سي کندهار
هلمند کې د جګړې اور لا هم سوړ شوی نه دی او نن 'جمعه 'د جګړې شپږمه ورځ حکومتي ځواکونو هڅه کوله د مرکز لښکرګاه پر ۶۰۱ لویه لاره د وسلوال طالبانو ولکه ختمه او دغه لار پرانیزي.
د ناوې او نادعلي ولسوالیو ځینو برخو کې لاهم جګړه روانه ده او د جګړې دواړه غاړې یو پر بل ګوزارونه کوي.
یوې امنیتي سرچینې بي بي سي ته وویل، تېره شپه د هلمند امنیه قومندان خلیل الرحمان جواد، ناوې ته روان و چې په لار کې يې د ګاډو پر کاروان ماین چاودلی او بېرته مرکز ته ستون شوی دی.
د هلمند د والي رسنیز دفتر وایي، تېره شپه د عملیاتو پر مهال د ناوې لپاره د وسلوالو طالبانو نومول شوی ولسوال د خپلو دووساتونکو سره وژل شوی دی.
د عکس سرچینه، AFP
بل لور ته د هلمند والي محمد یاسین خان وایي، د وسلوالو ډله ییز بریدونه یې په شا تمبولي او د لاسه وتلو سیمو لپاره یې په څو برخو کي ځمکني او هوایي بریدونه پیل کړي دي.
د هلمند والي همدا راز وویل، دغه شپږ ورځنۍ جګړه کې د دوی ۳۰ سرتېرو ته مرګژوبله اوښتې ده.
د یاسین خان په خبره د لښکرګاه ښار کلابند نه دی او ۶۰۱ لويه لاره، چې کندهار له دغه ښار سره نښلوي، د بېرته پرانیستلو لپاره یې هڅې ګړندۍ کړې دي.
د هلمند والي د هغو کورنیو د ژغورولو په اړه، چي د جګړې له کبله خپلو سیمو کې ایسار پاتې دي وویل، د دوی ځواکونه و توانېدل چې لار پرانیزي، څو هغوی خوندي سیمو ته ځانونه ورسوي.
د عکس سرچینه، Msf
بل لور ته تر دې دمه د ۳۵ زره بې ځایه شویو څخه پنځه سلنه کسانو بېړنۍ مرستې تر لاسه کړې دي.
د هلمند د کډوالو ادارې مشر سید محمد رامین وایي، هڅه یې دا ده هغو کورنیو ته چې د اوسېدو لپاره ځای نه لري او بېړنيو مرستو ته اړ دي د نړیوالو مرستندويه ادارو په مرسته نغدي مرسته ورکړي.
د اړمنو کورنیو مالومول، چې بېړنیو مرستو ته اړتیا لري سختیږي، ځکه ګڼ نور کسان هم د دې مرستو د ترلاسه کولو لپاره هڅه کوي.
هغه مهال ، چې بریتانوي ځواکونه هلمند کې وو، تر ټولو دروند سرزیان یې د دغه ولایت نادعلي او مارجه کې لیدلی او اوس په همدې سیمه کې افغان ځواکونه او طالبان سره مخامخ دي او داسي ښکاري چې سختې ورځې به تر مخ وي.
