کورونا وېروس: افغان حکومت د روژې تر پایه محدودیتونه وغځول
د عکس سرچینه، Getty Images
د افغانستان ولسمشرۍ ماڼۍ وايي، د کورونا وېروس خپرېدو په موخه لګول شوي، محدودیتونه د روژې میاشتې تر پایه غځول شوي دي.
د ارګ له لوري په یوه ټویټر پیغام کې ویل شوي، د کابینې په غونډه کې پرېکړه شوې چې پر ګرځېدو راګرځېدو محدودیتونه او له پلازمېنې کابله ولایتونو ته او برعکس د الوتنو توقیف لړۍ هم د روژې میاشتې تر پایه پورې غځول کېږي.
په پیغام کې دغه راز راغلي چې د کابینې غونډې د ۱۳۹۹ کال په بودیجه کې تعدیلات منلي او دغه راز یې له کورونا وېروس سره د مبارزې لپاره له عامې روغتیا وزارته د بشري منابعو استخدام پلان هم تصویب کړی دی.
د یادونې ده چې په بودیجه کې تعدیلات هم د کورونا وبا سره د مبارزې له کبله شوي.
بل لور ته په کابل کې د بي بي سي خبریاله ملایکه احمدزۍ د افغان چارواکو له قوله وايي، دغه هېواد کې په تېرو ۲۴ ساعتونو کې د کورونا ۱۷۹ تازه پېښې ثبت شوې دي، ۴ کسان له همدې کبله مړه شوي او ۲۱ کسان له ناروغۍ رغېدلي دي.
په ثبت شویو شمېرو کې تر ټولو لوړه شمېره د پلازمېنې کابل ده چې ۷۵ تنه دي. په ټول افغانستان کې له پیله تر دې دمه ۲۴۶۹په کورونا وېروس اخته شوي دي.
په داسې حال کې چې د کرونا ناروغۍ له کبله رامنځ ته شوې بې روزګاري کابل کې ډېر کسان د لوږې تر حده رسولي، اړوند چارواکي وايي، یو شمېر کورنیو سره د مرستې لړۍ روانه کړې.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د کورونا پر وړاندې د مبارزې بېړنۍ کمېټه چې مشري یې د کابل والي کوي وايي، دولت تر خپله وسه له اړمنو سره مرسته کوي. د کابل والي ویاند ناصر مهري بي بي سي ته وویل:
''ډېر ژر به له پنځو زرو زیاتو بې وزلو کورنیو ته څه باندې ۵ قلمه خوراکي توکي وویشل ش ''
خو د مرستې دا شمېر چې ښاغلي مهري یې یادوي د کابل په نژدې ۵ نیم میلیونه وګړو کې ډېر څرګند نه ښکاري.
رسمي شمېرې ښيي چې ۲۴ سلنه افغانان هیڅ روزګار نه لري.
د اقتصاد وزارت د شمېرو له مخې د کورونا وېروس مخنیوي قرنطین اقداماتو له کبله ۷۰۰ سوه زره کسان چې ورځني کارونه یې درلودل بې روزګار شوي او ښایې دغه کچه ۴۰ سلنې ته لوړه کړي.
