ادریس زمان: پاکستان ته د طالبانو سفر د سولې بهیر سره هېڅ تړاو نه لري
د عکس سرچینه، GMIC
د افغانستان دبهرنیو چارو وزارت سیاسي مرستیال وایي، اسلام اباد ته د طالبانو وروستی سفر د سولې له بهیر سره هیڅ تړاو نه لري. ادریس زمان نن یوې خبري ناستې ته وویل، طالبان له امریکایي چارواکو سره د امریکایي پوهنتون د دو یرغمل شویو استادانو د خلاصون د خبرو په اړه پاکستان ته تللي.
ښاغلی زمان ټینګار کوي چې د سولې لپاره باید طالبان لومړی تاوتریخوالی کم کړي.
بل لورته ادریس زمان د بهرنیو چارو وزارت د ویاند وروستۍ څرګندونې هم د هغه شخصي نظر بولي:
''د بهرنیو چارو وزارت د هغه سیاست پلي کوونکی دی چې ولسمشر او یو شمېر ادارو جوړ کړی دی. د دغه سیاست خلاف هر ډول څرګندونې شخصي نظر شمېرل کېږي. دا ډول خبرې د بهرنیو چارو وزارت دریځ نه دی. په وزارت کې هېڅ ډول دوه ګونی والی نه شته. زموږ خبرې له یوه دریځه دي. ''
د بهرنیو چارو وزارت ویاند صبغت احمدي ویلي و، د ملګرو ملتونو په عمومي غونډه کې د افغانستان حضور ډېر کمزوری و او دوی ملګرو ملتونو ته د تللي افغان پلاوي په سفر نه و خبر.
ادریس زمان بیا د ملګرو ملتونو سفر له لاسته راوړنو ډک بولي. له یوه وزارته د دوه ډوله خبرو راپورته کیدل ځینې په دغه وزارت کې د اختلاف نښې بولي.
له دې مخکې د افغانستان د ولسمشرۍ ویاند د بهرنیو چارو وزارت د ویاند هغه څرګندونې رد کړې، چې ګنې دغه وزارت د سولې په تړاو د پاکستان د هڅو هرکلی کوي. صدیق صدیقي وايي دا د بهرنیو چارو وزارت د ویاند شخصي نظر دی او د سولې په اړه پالیسي ارګ جوړوي.
د عکس سرچینه، AFP
صدیق صدیقي پر خپل ټوېټر لیکلي: "د سولې په اړه پالیسي د ولسمشرۍ ماڼۍ له خوا اعلان شوې ده. د طالبانو او پاکستان ترمنځ لیدنه یا د سولې بهیر په اړه د بهرنیو چارو وزارت د ویاند وروستۍ څرګندونې د افغان حکومت د دریځ استازیتوب نه کوي، بلکې دا د هغه شخصي نظر دی."
د ښاغلي صدیقي له ټوېټ وروسته، د بهرنیو چارو وزارت ویاند صبغت الله احمدي په یوه ټوېټر کې لیکلي: "د بهرنیو چارو وزارت د هېواد د بهرنۍ پالیسۍ یوازېنی تطبیقوونکی بنسټ دی او د سولې بهیر د ټولو هغو هڅو هرکلی کوي چې سولې ته لار هواروي."
د تېرې جمعې په ورځ صبغت الله احمدي ویلي و، اسلام اباد کې د افغان طالب پلاوي او پاکستاني چارواکو ترمنځ د سولې خبرې پیل شوې چې احتمال شته د طالبانو او د امریکا ترمنځ بیا خبرو پیلېدو ته لار هواره کړي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
ښاغلي احمدي ویلي وو، د افغانستان د بهرنیو چارو وزارت د پاکستان له خوا د طالبانو د کوربه توب هرکلی کوي:
"دا ځل له پاکستانه زموږ هیله دا ده چې په صادقانه او اغېزناکه توګه له افغان حکومت سره د سولې مېز ته د طالبانو په راوستلو کې کار وکړي."
دوه ورځې وړاندې، د افغانستان ولسمشرۍ ماڼۍ د پاکستاني چارواکو له خوا د طالب مرکچیانو هرکلی د ډیپلوماټیکو اصولو خلاف کار بولي.
د ارګ ویاند د پنجشنبې په ورځ یوې خبري غونډې ته ویلي و چې دا ډول تګ راتګ د سولې له بهیر سره هېڅ ډول مرسته نه شي کولای.
د عکس سرچینه، MFA
په یوه ویډیو کې طالب مرکچیان لیدل کېږي چې د یوې ودانۍ مخې ته یې د پاکستان د بهرنیو چارو وزیر شاه محمود قریشي او د استخباراتو مشر جنرال فیض حمید هرکلي ته ولاړ دي او په غېږ ورسره روغبړ کوي.
له طالبانو سره د امریکا له خوا د سولې خبرو تر لغوه کولو وروسته دا د سیمې هېوادونو ته د طالبانو څلورم سفر دی. طالبان له پاکستانه مخکې چین، ایران او روسیې ته هم تللي وو.
