حکومت د ټاکنو په تړاو د یو شمېر ګوندونو غوښتنې "رد کړې"

د افغان ولسمشر د دویم مرستیال په مشرۍ غونډه کې د ګوندونو استازو ته ویل شوي، حکومت داسې هیڅ وړاندیز نه شي منلی چې د ټاکنو د ځنډېدو لامل کېږي.

سیاسي ګوندونو غوښتنه کړې چې د رایه ورکوونکو اوسنی نوملړ دې له منځه یوړل، د رایو سیسټم دې بدل او ګوندونو ته په ټاکنو کې ځانګړې ونډه ورکړل شي.

د ولسمشر د دویم مرستیال دفتر وايي، هیڅ داسې وړاندیز نشي منلی چې په ټاکنو کې ځنډ رامنځته کوي.

د نوموړي له دفتر پرون ناوخته په خپره شوې وینا پاڼه کې ویل شوي، د حکومت او د ځینو ګوندونو د استازو په ګډه غونډه کې وپتیل شوه چې د ولسي جرګې او ولسوالیو شوراګانو ټاکنې به د راتلونکې تلې میاشتې په اته ویشتمه نیټه خامخا کیږي او حکومت په دې برخه کې هیڅ داسې وړاندیز نشي منلی چې په یاده نیټه د ټاکنو کېدل له خطر سره مخامخوي.

* د تلې ۲۸ د پارلماني او ولسوالیو شوراګانو د ټاکنو نېټه اعلان شوه

* "د رای ورکوونکو د ثبت بهیر باطلول ټاکنې کړکېچ ته بیايي"

په وینا پاڼه کې د رایه ورکوونکو د اوسني نوملړ د لغوه کولو او د بایو مټریک په اړه ویل شوي حکومت ډاډه نه دی چې دا چاره به په ټاکلي وخت د یوې ځانګړې کمپنۍ د وړاندیز له مخې ترسره شي.

خو که د ټاکنو کمیسیون یې ومني حکومت په دې برخه کې کومه ستونزه نه لري.

باید وویل شوي چې د ټاکنو کمیسیون لا له وړاندې دا غوښتنه رد کړې وه .

حکومت د ټاکنیز نظام د بدلون غوښتنه هم نه ده منلې.

په دې وینا پاڼه همدې موضوع ته اشاره شوې چې د دې وړاندیز عملي کېډل وخت ته اړتیا لري او پکار ده دا چاره د یوه پراخ ملي بحث په پایله کې ترسره شي او غوره لار دا ده چې په دې اړه ملي شورا پریکړه وکړي.

سیاسي ګوندونو غوښتنه کړې چې د رایو سیستم د لیږد وړ رایو سیسټم ته واړول شي چې د ګوندونو استازي وکولی شي ترلاسه کړې رایې یو د بل په ګټه وکاروي.

خبر پاڼه زیاتوي نور د یو شمیر ګوندونو د وروستیو وړاندیزونو په اړه د بحث لړۍ پای ته رسیږي.

د ګوندونو غوښتنې

یو شمیر سیاسي ګوندونو درې بنسټیز وړاندیزونه کړي وو.

د ولسمشر د دویم مرستیال له دفتر په خپره شوې وینا پاڼه کې دا نه دي ویل شوي چې په دغه غونډه کې د کومو ګوندونو استازو برخه لرله.

څه موده وړاندې د حزب اسلامي، د خلکو وحدت، جمعیت اسلامي، وحدت اسلامي، جنبش اسلامي او افغان ملت په ګډون څه باندې شلو سیاسي ګوندونو دا غوښتني کړې وې.

د دې غوښټنو د څېړلو لپاره د حکومت، ټاکنو کمیسیون او د ګوندونو استازو یو ګډه کمیټه ټاکل شوې وه.

د یادونې ده چې د ټاکنو خپلواک کمیسیون په ټوله کې د سیاسي ګوندونو د وړاندیزونو په ځواب کې وړاندې ویلي و چې د قانوني محدودیتونو له امله د ګوندونو وړاندنیزونه عملي کولی نشي.