اندونیزیا کې د "ښکلا ملکې" ته ځینو نوماندو ښځو پولیسو ته شکایت کړی

اندونیزیا کې د ښکلا ملکې غوره کولو پروګرام کې څو تنو برخه اخیستونکو پولیسو ته شکایت کړی دی. دوی د یاد پروګرام پر جوړونکو د جنسي ځورونې اړوند تور لګولی دی.

د شکایت کوونکو ښځو وکیل وايي، د روانې اګست میاشتې په درېیمه د پروګرام له وروستی پړاو څخه دوه ورځې مخکې د ښکلا سیالۍ پروګرام کې له ګډونوالو غوښتل شوي وو، چې د بدن د معاینې او انځورونو اخیستو لپاره خپلې برسېرنې جامې وباسي.

شکایت کوونکې ادعا کوي، چې کله د دوی بدن معاینه کېده، په هغه خونه کې نارینه هم موجود وو.

په اندونیزیا کې د ښکلا د سیالۍ پروګرام د حکومت د اجازې له مخې ترسره کېږي. خو تنظیم کونکي باید دا په پام کې ولري، چې د محافظه کاره ټولنې وګړي ناراضه نه کړي.

د یادونې ده، چې په ۲۰۱۳ کال کې په دغه مسلمان هېواد کې د نړۍ د ښکلا د سیالیو تنظیموونکو، د سیالۍ وروستي پړاو په ترسره کېدو سره یې د لاندنیو جامو (بګني) سره د بدن ننداره لغوه کړه.

په پلازمینه جاکارتا کې پولیس وايي، چې شکایتونه به د لانورو څېړنو لپاره دیوه بنسټ په توګه وکارول شي.

د اندونیزیا د قانون له مخې د جنسي ځورونې سزا تر ۱۵ کالونو بند دی.

میلیسا اینګریني، چې د درېیو کاندیدانو وکیله ده، د اندونیزیا لپاره د بي بي سي څانګې ته دا شکایت تائید کړی.

نوموړې ویلي، د شکایت کوونکو په شمېر کې به زیاتوالی راشي.

همدارنګه رویټرز بیا راپور ورکړی، چې شپږو نوماندانو له پولیسو سره خپل شکایتونه ثبت کړي دي.

میلیسا اینګریني رسنیو ته ویلي: "تنظیم کونکو، نوماندانو ته وویل، چې د بدن د معاینې موخه یې د دوی په بدن د نښانونو او ټاټو ارزول دي."

د ښکلا نړیوالې ادارې هم ویلي، چې یاده موضوع څیړي او د جنسي ځورونې تورونه په جدي توګه تعقیبوي.

ځینو شکایت کوونکو د دوشنبې په ماښام په یوه خبري غونډه کې ویناوې وکړې، خو سیمه ییزو تلویزیونونو د دوی د هویت پټولو لپاره د هغه مخونهنه ښوول.

یوې نوماندې خپلو خبرو کې وویل: "د یوې ښځې په توګه زه احساس کوم، چې زما حقونه تر پښو لاندې شوي دي. زما په ذهن یې بد اغېز کړی دی. زه د ډېر فکر کولو له کبله سم خوب نه شم کړی."

یادې نوماندې وویل، دا سمه ده چې د بدن معاینه یې په یوه بنده خونه کې وشوه، خو هلته نارینو هم وو.

د اندونیزیا یوه پخوانۍ میرمن ماریا هارفانتي، چې په ۲۰۱۵ کال کې د نړۍ د ښکلا په سیالیو کې درېیم مقام خپل کړ وايي، په هېوادونو کې د بدن معاينه يوه عامه خبره ده، خو په سياليو کې له ګډون کوونکو ښځو څخه معمولا د بربنډېدو غوښتنه نه کېږي.

نوموړې وايي، د بدن معاینه د دې لپاره کېږي چې د بدن تناسب یې معلوم کړي.