تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د چین پوځي تمرینونه؛ لسګونه پوځي الوتکې د تایوان له تنګي تېرې شوې
د چین پوځ د تایوان په سمندر غاړو کې درې ورځني پوځي تمرینونه پیل کړي او په همدې لړ کې یې خپلې څه باندې ۷۰ جنګي الوتکې له تایوان تنګي ور اړولې وې.
د یادونې وړ ده چې د چین پوځي الوتکې د لنډې مودې لپاره له تنګي اوښتې وې.
چین خپله دا چاره د هغې کړنې پر وړاندې جدي خبرداری بللی چې دغه هېواد یې "له بهرنیو ځواکونو سره د تایوان د بېلتون غوښتونکو یو لاس کېدل" یادوي.
د تایوان دفاع وزارت وايي، د چین ۴۲ پوځي الوتکې او اته بېړۍ له منځنۍ کرښې (تایوان تنګي) د لنډې مودې لپاره ور اوښتې وې.
د تایوان دفاع وزارت د چین دا ګام "غیر منطقي" بللی او هغه یې غندلی دی.
دغه پوځي تمرینونه څو ساعته وروسته له هغه پیل شو چې د تایوان ولسمشره تسای انګ وین دمتحده ایالاتو له سفره خپل هېواد ته ستونه شوه.
اغلې تسای انګ وین امریکا ته د خپل سفر پر مهال د متحده ایالاتو د ولسي جرګې له مشر کیون مک کارتي سره کتلي و.
دې لېدو کتو چین په غوصه کړی او دا هېواد ادعا کوي چې د تایوان ټاپو د چین خاوره ده.
د تایوان ولسمشرې اسای انګ وین د چین پوځي تمرینونو په غبرګون کې ویلي، د تایوان خلک له ډیموکراسۍ سره مینه لري او سوله غواړي.
نوموړې زیاته کړې، تایوان د چین "ظالمانه واکمنۍ له پراختیا" سره مخامخ دی.
همدارنګه تسای انګ وین وايي، په وروستيو کلونو کې موږ د چین له پرله پسې استبدادي پراخوالي سره مخامخ شوي يوو.
د تایوان ولسمشره زیاتوي، تايوان به له امريکا او نورو ورته فکر لرونکو هېوادونو سره په ګډه د ازادۍ او ډيموکراسۍ د ارزښتونو د دفاع لپاره خپلو همکاريو ته دوام ورکړي.
له ٢٠١٦ کال راهيسې چې تسای انګ وین د تايوان ولسمشره شوې، د چين او تايوان اړيکې لاپسې ترينګلې شوې دي.
چین په دې ډېر غوصه دی چې د تایوان ولسمشره له هغې سیاسي هوکړې چې د "یو چین" نومېږي، سرغړونه کوي.
دواړو خواو په ١٩٩٢ کال کې هوکړه وکړه چې يوازې يو چين دی، خو له همدې ټکي دا دواړه هېوادونه بېل بېل تعبیرونه لري.
بلخوا د چین سمندري چارواکو پوځي بېړیو ته خبرداری ورکړی چې د خپلو تمرینونو پرمهال له منځنۍ کرښې لېرې و اوسي.
په پام کې ده چې ورته تمرینونه د روانې اپریل پر ۱۷مه او ۲۰مه هم وشي.
د چين له نظره تايوان يو خپلواکه ولايت دی چې د چين له خاورې څخه جلا شوی او بلاخره به يو ځل بيا د دغه هېواد برخه شي.
د تایوان د حکومت په وینا، د تایوان ټاپو یو خپلواک هېواد دی چې اساسي قانون او په دیموکراتیک ډول ټاکل شوي مشران لري.
