د پاکستان قامي اسمبلۍ کې د اپوزيسیون تحريک بريالی؛ عمران خان له واکه لېرې کړل شو
د عکس سرچینه، Getty Images
د پاکستان په قامي اسمبلۍ کې د لومړي وزیر عمران خان پر ضد ۱۷۴ غړو د نه باور رایه ورکړه. دغه بهیر چې څو ځله مخکې ځنډېدلی و.
دا د پاکستان په تاريخ کې لومړی ځل دی چې د يوه لومړي وزير پر ضد د نه باور رايې تحرک بريالی کېږي.
د ملي شورا شاوخوا ټینګ امنیتيګامونه اخیستل شوي او پولیس هر ځای لېدل کېږي.
دا مهال تازه خبرونه ښيي چې عمران خان د لومړي وزير له دفتره وتلی او په بني ګاله کې خپل شخصي استوګنځي ته تللی دی.
په همدې وخت کې د پاکستان د قامي اسمبلۍ مشر اسد قيصر له خپلې دنده استعفا کړې. له دې وروسته به د مسلم ليګ نواز ګوند ایاز صادق د قامي اسمبلي مشري پر غاړه وړي.
اسد قيصر وويل: "ځمکنيو حقايقو او پېښو ته په کتو مې پرېکړه وکړه ما ته چې کوم اسناد را رسېدلي، زه به د اپوزسيون له مشر غوښتنه وکړم چې دا زما په دفتر کې وي، زه به يې سترې محکمې ته واستوم، اړتيا ده چې د دې هېواد د حاکميت لپاره ودرېږو او ما پرېکړه وکړه چې زه نور د قامي اسمبلۍ د مشر پر دنده نشم پاتې کېدی".
قامي اسمبلۍ کې د اپوزېسیون غړي تور پورې کاوه، چې د تحریک انصاف ګوند وکیلان د رایې اچونې مخنیوي لپاره وخت ضایع کوي.
قامي اسمبلۍ به اوس نوی لومړی وزیر ټاکي.
نوی لومړی وزیر به د ۲۰۲۳ کال تر اوکټوبره تر هغې چې راتلونکې ټاکنې نه وې شوي، په واک پاتې کېدای شي.
د پاکستان سترې محکمې پر پنجشنبه پرېکړه وکړه چې ۶۹ کلن عمران خان د اساسي قانون خلاف د نه باور رایې د مخنیوي لپاره پارلمان لغوه کړی و.
د ښاغلي خان همدې پرېکړه په ملي شورا کې سیاسي مخالفان ډېر قهرولي وو.
د پاکستان د کرېکټ دغه پخوانی ملي لوبغاړی په ۲۰۱۸ کال کې واک ته ورسېد او ژمنه یې کړې وه چې فساد به له منځه وړي او د پاکستان اقتصاد به رغوي.
خو مخالفان یې وايي چې عمران خان په کړو ژمنو کې پاتې راغلی و. د تېر میاشتې په پای کې د نوموړي ځینې پارلماني غړو د هغه له ملاتړه لاس واخیست او ښاغلی خان یې په قامي اسمبلۍ کې له اکثریت محروم کړ.
ښاغلي خان بیا بیا تور پورې کاوه چې سیاسي مخالفانو د بهرنیانو په مرسته له واک له لرې کېدل غوښتل. عمران دا ادعا هم کوله چې امریکا له دې امله د نوموړي د لرې کېدو هڅه کوله چې پر اوکرایین د روسیې د یرغل په مقابل کې یې د واشنګټن ملاتړ نه و کړی.
امریکا د هغه خبرې په کلکه رد کړې دي.
پر شنبه څه وشول؟
اسمبلۍ کې د اپوزېسیون ګوندونو غړي په پرله پسې ډول ټینګار کاوه چې ژر تر ژره دې رایې واچول شي.
د مسلم لیګ (ن)، پیپلز ګوند او جمعیت علمای اسلام (ف) ګوند غړي اندېښنه ښيي چې ګوندې د رایې اچونې مخنیوي لپاره د وخت ضایع کېدو هڅې روانې دي.
د واکمن تحریک انصاف ګوند وکیلان د خپلې دې ادعا په تکرار اوږدې ویناوې کوي، چې د لومړي وزیر د ګوښه کېدو لپاره نړیواله توطیه روانه ده.
د پاکستان د خلکو ګوند مشر بلاول بوټو په خپل ټویټر لیکلي چې قامي اسمبلۍ کې بحثونه غیرقانوني دي، او د مسلم لیګ (ن) مشر شهباز شریف بیا وايي تحریک انصاف ګوند راېې اچونې ته د اجازه په نه ورکولو سره د سترې محکمې د پرېکړې سپکاوی کوي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 1
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 2
له دې سره عمران خان شنبه د شپې پر ۹ بجو یو ځل بیا د مرکزي کابینې غونډه وربللې ده.
د پاکستان قامي اسمبلۍ نن ګهیځ له ځايي وخت سره سم نژدې لس نیمې بجې د دې هېواد د سترې محکمې د حکم له مخې غونډه پیل کړه.
د قامي اسمبلۍ یا جرګې مشر اسد قیصر د نننۍ غونډې مشري کوي.
په اسمبلۍ کې د اپوزېسیون ګوندونو ګڼ شمېر پارلمان غړو برخه اخیستي، خو د حکومتي وکیلانو څوکۍ په ظاهره تشې ولیدل شوې.
د قامي اسمبلۍ مشر غونډې ته وویل، د سترې محکمې له پرېکړې سره سم به د پارلمان غونډه پر مخ ځي. نوموړی وايي، هغسې چې د نړیوالې توطئې خبره راپورته شوې، اسمبلۍ به پرې خبرې کوي.
خو په اسمبلۍ کې د اپوزېسیون مشر میا محمد شهباز شریف وویل، د محکمې له امر سره سم باید پارلمان مشر د بې باورۍ تحریک لپاره رایې اخیستنه پيل کړي.
د عکس سرچینه، NASA
غونډې ته د پاکستان بهرنیو چارو وزیر شاه محمود قریشي د وینا په ترڅ کې د اپوزېسیون پارلمان غړو له لوري غږونه پورته شول او له هغه وروسته د اسمبلۍ مشر اسد قیصر تر ۱۲ نیمو بجو د غونډې ځنډولو اعلان وکړ. نوموړي ناڅاپه وویل:
''زه به داسې وکړم، چې تر ۱۲ نیمو بجو پورې به غونډه وځنډوم. ''
د بي بي سي خبریال سکندر کرماني پر ټویټر پاڼه یو تصویر خپور کړی، چې پکې د پاکستان قامی اسمبلۍ ځینې غړي د بنرونو پر چمتو کولو بوخت ښکاري. پر دې بنرونو لیکل شوي دي: ''هغه چې د امریکا یار دی، غدار دی. ''
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 3
له یوې اوږدې وقفې وروسته د قامي اسمبلۍ غونډه بیا پیل شوه او د بهرنیو چارو وزیر شاه محمود قریشي اپوزېسیون مشرانو ته بلنه ورکړه چې د پاکستان سفیر په شتون کې د تړلو دروازو تر شا هغه لیک وګوري چې د لومړي وزیر عمران خان په وینا د ده حکومت پر ضد د توطئ لړ کې استول شوی دی.
پرون جمعه د غونډې شپږ ماده ییزه اجنډا خپره شوې، چې له مخې یې په نننۍ غونډه کې د لومړي وزیر عمران خان پر ضد د بې باورۍ رایې په هکله رایه اچوونه کېږي.
د پاکستان سترې محکمې پنجشنبه ماښام د دغه هېواد پارلمان کې د لومړي وزیر عمران خان پر ضد د نه باور رایې قرارداد مخنیوی غیر قانوني وباله اوس داسې برېښي چې دی به واک له لاسه ورکړي.
د عکس سرچینه، EPA
محکمې وویل قامي اسمبلۍ کې به شنبه عمران خان ته د "نه باور رایې" پروسه کې رایې واچول شي.
عمران خان په وروستۍ وينا کې د ده د بېواکه کولو لپاره د اپوزېسيون ګوندونو له خوا پیل شوې پروسه نړيواله توطيه ياده کړه.
پر لومړي وزیر د بې باورۍ دا قرارداد د اپوزېسيون ګوندونو ائیتلاف لخوا وړاندې شوی دی.
د بي بي سي خبریاله حمیرا کنول وايي، د پارلمان په شاوخوا کې ګڼ شمېر امنیتي ځواکونه ځای پر ځای شوي دي.
د پلازمېنې اسلام اباد پولیس وايي، له مارګله روډ او سرینا څلور لارو لخوا د پارلمان شاوخوا سیمو ته د تګ راتګ اجازه ورکول کېږي.
دې سیمې ته چې ریډ زون بلل کېږي، ټولې غځېدلې لارې په کانتینرونو تړل شوې دي او د پولیسو مرستې لپاره ملېشه ځواکونه هم ځای پر ځای شوي دي.
بل لومړي وزیر عمران خان تېر ماښام پاکستانیانو ته په وینا کې یو ځل بیا تور پورې کړ، چې د حکومت ړنګولو لپاره یې د امریکا له لوري دسیسه چمتو شوې ده.
د عکس سرچینه، Reuters
خو امریکا متحدو ایالتونو د نوموړي تورونه رد کړي دي.
د امریکا بهرنیو چارو وزارت مرستیالې ویاندې جلینا پورټر په دې هکله یوې پوښتنې ته چې ښاغلی خان وايي، دوی داسې ثبوتونه لري، چې امریکا د ده حکومت پر ضد د بې باورۍ تحریک هڅولی، وویل: ''زه به په پرېکنده ډول ووایم، چې دا تورونه بې بنسټه دي. ''
نوموړې زیاته کړه: ''موږ د پاکستان سیاسي وضعیت څارو، په پاکستان کې د قانون واکمنۍ ملاتړ کوو، خو دا تورونه رښتیا نه دي. ''
تېره یکشنبه د عمران خان واکمن تحریک انصاف ګوند د پاکستان قامي اسمبلۍ یا ولسي جرګه کې د 'نه باور رایې' پروسې مخه ونیوه چې ډېر باور کېده، هغه به یې وبایلي.
د نوموړي حکومت له هغې سملاسي وروسته د ولسمشر عارف خان علوي د حکم په مټ قامي اسمبلۍ منحل کړه او له وخته مخکې یې د نویو ټاکنو اعلان وکړ.
خو قهریدلو اپوزېسیون ګوندونو د هېواد له سترې محکمې وغوښتل چې مداخله وکړي او د نه باور قرارداد مخنیوي په هکله له قانوني پلوه پرېکړه وکړي.
