Dh'fhaodadh gun cuir Comhairle na Gàidhealtachd an aghaidh phlanaichean 'son sgeama haidro

Dh'fhaodadh gun cuir Comhairle na Gàidhealtachd an aghaidh phlanaichean airson pròiseact haidro mòr ann an Loch Abar.

Tha Fearna PSH Ltd ag iarraidh ath-leasachadh a dhèanamh air seann ionad haidro ann an Loch Chuaich, faisg air Inbhir Garadh, gus a dhèanamh mar sgeama far a bheil uisge ga phumpadh gu lochan àrda airson a stòradh.

Ann an aithisg, tha oifigich na comhairle ag ràdh gu bheil dragh ann mun bhuaidh air cruth na tìre agus fiadh-bheatha, cho math ri rathaidean dùthchail leis na bhios orra de charbadan.

Thuirt an luchd-leasachaidh gun robh am pròiseact "cudromach gu nàiseanta" agus gum biodh comas ann stòrasan mòra de cumhachd a ghlèidheadh gus am biodh feum orra.

Tha comhairlean coimhearsnachd, a' bhuidheann Mountaineering Scotland, agus Comann Rìoghail Dìon nan Eunlaith cuideachd air draghan a thogail.

Dh'iarr Riaghaltas na h-Alba air Comhairle na Gàidhealtachd am beachd mun phròiseact a thoirt seachad.

Anns an aithisg a thèid air beulaibh Comataidh Dealbhachaidh a' Chinn a Deas an ath-sheachdain, thuirt ofigearan nach robh planaichean iomchaidh ann gus buaidh an sgeama air an àrainneachd a lùghdachadh.

Thuirt iad cuideachd gum biodh droch bhuaidh ann air sgìrean a tha air an dìon, agus gum faodadh an sgeama cron a dhèanamh air lìonra nan rathaidean ionadail.

Tha oifigich a' moladh gun cuir comhairlichean an aghaidh nam planaichean.

Thuirt an aithisg gu bheil Fearna PSH Ltd air taisebanaidhean poblach a chumail mu na planaichean.