Bile na Croitearachd air an Treas Ìre a ruighinn

Bhòtaidh buill na Pàrlamaid Albannaich Diardaoin air reachdas ùr a dhèanadh riaghaltean croitearachd na bu shìmplidh agus na bu fhreagarraiche aison an là an-diugh.

Tha Bile na Croitearachd cuideachd a' moladh Cùirt an Fhearainn 's Tribiunal an Fhearainn a thoirt còmhla gus am bi aon bhuidheann ann airson dèiligeadh ri eas-aonta.

Tha riaghailtean agus laghan croitearachd tric gan càineadh airson a bhith sean, doirbh a thuigsinn, agus aig amannan a leantainn.

Bho thaobh an riaghaltais dheth, tha am bile seo ann airson tòrr den sin a chur ceart.

Bheireadh e barrachd chothroman do chroitearan leasachaidhean àrainneachdail a dhèanamh air an talamh a tha iad ag obrachadh.

Theannaicheadh e na riaghailtean a thaobh croitean a bhith gan gluasad gu urrasan prìobhaideach agus companaidhean.

Dhèanadh e cuideachd nas fhasa e croitean a shìneadh do bhall teaghlaich gun feum air sin a shanasachd gu poblach.

Thèid sreath de dh'atharrachaidhean a dheasbad feasgar Diardaoin aig Holyrood air thoiseach air deasbad agus bhòt air an dreach mu dheireadh den bhile Dimàirt an ath-sheachdain.