EGM Stòras Uibhist air a dearbhadh

Thèid coinneamh èiginneach Sealladh na Beinne Mòire - companaidh pàrant Stòras Uibhist - a chumail air an t-16mh den Ghiblean.

Tha buaireadh is eas-aonta air a bhith a' cuairteachadh an uachdarain choimhearsnachd ann an Uibhist a Deas fad mhìosan a-nise is air buaidh mhòr a thoirt air obair is cliù na buidhne.

Às dèidh chòmhraidhean le Comhairle nan Eilean Siar air a' mhìos a chaidh, chaidh aontachadh gum fàgadh gach stiùiriche air gach companaidh taobh a-staigh Sealladh na Beinne Mòire an dreuchdan.

Fon phlana, bhiodh moladh ga chur air adhart aig EGM gun rachadh bòrd eadar-amail a stèidheachadh air am biodh comhairlichean ionadail agus co-dhiù aon stiùiriche le eòlas proifeiseanta.

Bhiodh fòcas acasan gu sònraichte air cùisean a chur air dòigh timcheall air àrachas is maoineachadh, mus biodh AGM ann as t-samhradh.

Tha fios a-nise gum bi an EGM ann air an t-16mh den Ghiblean ann a Talla a' Chinn a Deas ann an Dalabrog.