Stiùirichean Stòras Uibhist a' seasamh sìos is bòrd eadar-amail san amharc

Tha stiùirichean Stòras Uibhist uile gus na dreuchdan aca fhàgail agus EGM gu bhith ann.

Thèid moladh a chur air adhart aig an EGM gun tèid bòrd eadar-amail a stèidheachadh air am biodh comhairlichean ionadail agus co-dhiù aon stiùiriche le eòlas proifeiseanta.

Thàinig dearbhadh air an seo Diardaoin ann am brath ann an ainm an dà chuid Sealladh na Beinne Mòire - a' chompanaidh phàrant - agus Cumhachd Ath-nuadhachail Uibhist a Deas (SURE), tè na companaidhean a tha fodhpa taobh a-staigh na buidhne.

Thàinig e cuideachd às dèidh chòmhraidhean ann an Uibhist Diciadain anns an robh Comhairle nan Eilean Siar an sàs.

Tha am brath ag ràdh gum fàg gach stiùiriche air gach companaidh taobh a-staigh Sealladh na Beinne Mòire an dreuchdan.

Thathar an dùil gum bi an triùir chomhairlichean ann an uard Uibhist a Deas, Èirisgeigh is Beinn na Faoghla air a' bhòrd ùr eadar-amail a bhiodh ann, còmhla ri dithis stiùirichean ionadail agus co-dhiù aon stiùiriche eile le eòlas proifeiseanta.

Tha dùil gum bi an EGM ann tràth sa Ghiblean is dòchas ann gun gabhadh AGM a chumail san Ògmhios far an rachadh stiùirichean leantainneach a thaghadh.

Sa bhrath, thuirt Sealladh na Beinne Mòire is SURE: "Tha sinn den bheachd gur e am plana eadar-amail seo an dòigh as fheàrr gus riaghladh is obair air feadh na buidhne a neartachadh.

"Le bòrd eadar-amail le fòcas air na gnothaichean deatamach seo, bidh bunait mhath ann airson stiùirichean ùra a thig a-steach às dèidh sin is saorsa aca a' bhuidheann a ghluasad air adhart.

"Tha sinn an dùil obrachadh gu dlùth le iasadaichean agus luchd-àrachais gus am bi earbsa aca gu bheil gnothaichean ag atharrachadh, agus gun aontaich iad àrachas ùrachadh is cothrom air maoineachadh fhosgladh dhuinn.

"Leigidh seo leinn a dhol air adhart leis a' phròiseas eadar-amail seo agus dùil gum bi sinn ann an suidheachadh AGM a bhith againn san Ògmhios agus stiùrichean ùra a thaghadh".

Tha sgaraidhean domhain air bualadh air uachdaran coimhearsnachd Uibhist a Deas anns na mìosan a chaidh seachad, a' fàgail cheistean mòra mu sheasmhachd na buidhne a' dol air adhart.

Nam measg tha mar a chaill tuath-gaoithe an uachdarain choimhearsnachd àrachas.

Air aon taobh den bhuaireadh a tha air a bhith ann tha triùir stiùirichean a tha air a' mhòr-chuid air bòrd Sealladh na Beinne Mòire.

Air an taobh eile tha dithis stiùirichean eile le taic bho fheadhainn aig àrd-ìre sa sgioba cheannais ann an oifis Stòras.

Tha smachd air a bhith acasan air làrach-lìn agus meadhanan-sòisealta Stòras is teachdaireachdan air tighinn bhuapa tro SURE anns na seachdainean mu dheireadh.

Nam measg bha brath bho SURE nas tràithe air a' mhìos seo a dh'iarr gun rachadh EGM a chumail de Shealladh na Beinne Mòire, ach gur e baileat dìomhair tron phost a bhiodh ann.

Chaidh sin a dhiùltadh le bòrd Sealladh na Beinne Mòire, a thuirt nach deach iarrtas coileanta airson EGM a chur air adhart is nach robh dearbhadh ann gun robh an t-iarrtas air gu lèor ainmean fhaighinn.

Bha bòrd Sealladh na Beinne Mòire fhèin air moladh gun rachadh bòrd neo-eisimeileach a stèidheachadh san ùine-ghoirid airson na buidhne gu lèir.

Bha iad airson is gun toireadh am bòrd seo molaidhean air adhart a thaobh structar na buidhne a leasachadh is a dhèanamh nas proifeiseanta, air thoiseach air bhòt gus stiùirichean ùra a thaghadh.

Leis mar a tha am brath ùr air tighinn bhon dà chuid Sealladh na Beinne Mòire agus SURE, bidh dòchas aig muinntir Uibhist a Deas gu bheil gnothaichean a-nise a' gluasad gu ruige fuasladh a ruighinn.