Ghluais Na Stàitean Aonaichte sgiobair tancair a-mach à uisgeachan Bhreatainn

Chaidh sgiobair agus ciad-oifigear tancair-ola a bha a' seòladh fo bhrataich Ruiseanaich a ghluasad a-mach à uisgeachan na Rìoghachd Aonaichte le Maoir-chladaich nan Stàitean Aonaichte.

Tha an tancair, am Marinera, air a bhith air acair far chosta Mhoireibh on thug na h-Aimeireaganaich an greim i deas air Innis Tìle air an 7mh den Fhaoilleach.

Dh'innis Roinn Ceartais nan Stàitean Aonaichte gu bheil an sgiobair, Avtandil Kalandadze, agus a cho-obraiche nach deach ainmeachadh a-nise air bòrd a' bhàta Aimeireaganaich Munro.

Tha an còrr den chriutha - 26 duine - air iarraidh an Rìoghachd Aonaichte fhàgail gu saor-thoileach.

Thathas a' tuigsinn gur ann às an Ruis, na h-Innseachan, Georgia is an Ucràin a tha iad.

Bha iad air an cumail aig taigh-òsta ann am Moireibh le oifigich in-imriche.

Tha planaichean gan dealbh an-dràsta gus còignear dhiubh a sgèith à Alba dha na Stàitean Aonaichte agus an còrr dha na dùthchannan dham boin iad.

Nas tràithe chaidh buidheann de dh'fhireannaich fhaicinn is iad a' fàgail taigh-òsta ann an Eilginn, faisg air RAF Inbhir Losaidh.

Nas tràithe bha oidhirp ann bho luchd-lugha às leth bean an sgiobair a bha ag amas air a chumail fo smachd chùirtean na h-Alba

'S e argamaidean luchd-lagha Natia Dzadzama gun robh còir aig an duine aice, a tha na shaoranach Georgia, a bhith air a dhìon le cùirtean na h-Alba agus laghan chòraichean daonna Eòrpach.

Thuirt am britheamh nach robh coltas ann gun robh leithid de chumhachd aige òrdugh a thoirt an aghaidh riaghaltais chèin.

Thuirt Àrd-neach-lagha a' Chrùin an Alba, Ruth Charteris KC: "Chan eil Oifis a' Chrùin no Ministearan na h-Alba aig àm sam bith air duine den chriutha no an sgiobair no a' chiad-oifigear a chumail an grèim no a chumail fo smachd."

Thuirt am fear-lagha Aamer Anwar, a tha a' riochdachadh bean an sgiobair, gu bheil a' chùis air "ceistean mòra bun-reachdail is laghail" a thogail.

"Cha ghabh an t-ath-bhreithneachadh laghail a thug Natia Dzadzama a-nise a chur an sàs oir chaidh, ann an da-rìribh, an duine aice a thoirt am bruid le Riaghaltas nan Stàitean Aonaichte air ranntair na h-Alba is Bhreatainn."

Thuirt Washington roimhe gu bheil na rinn iad laghail, aus chuir iad às leth a' Mharinera gun robh i a' briseadh smachd-bhannan le bhith a' giùlain ola às leth Bhenesuèla, na Ruis agus Iorain.