Taic do cheanglaichean stèidhichte air Caolas na Hearadh is Caolas Bharraigh

An MV Loch Portain aig Cidhe an t-Òib

Tha Comhairle nan Eilean Siar air taic a chur ri ceanglaichean stèidhichte thairis air Caolas na Hearadh is Caolas Bharraigh, ged a tha iad a' cur an aghaidh drochaid air neo tunail gu tìr-mòr na h-Alba.

Tha seasamh an ùghdarras ionadail a' nochdadh san fhreagairt aca gu rannsachadh a tha Comataidh nan Cùisean Albannach aig Westminster a' dèanamh an-dràsta air ceanglaichean stèidhichte do dh'eileanan.

Tha freagairt CnES ag ràdh gu bheil iad den bheachd gu bheil e deatamach dhan sgìre gun tèid ceanglaichean còmhdhail eadar na h-eileanan a leasachadh, is gu bheil iad gu seo air adhartas mòr a dhèanamh le ceanglaichean stèidhichte gu ruige Scalpaigh, Beàrnaraigh is Èirisgeigh.

'S e Caolas na Hearadh is Caolas Bharraigh na beàrnan mu dheireadh a tha air fhàgail, tha iad ag ràdh.

Thuirt an t-ùghdarras ionadail gum biodh sreath fada de bhuannachdan an cois cheanglaichean stèidhichte, nam measg:

  • ùine siubhail a ghiorrachadh

  • ceanglaichean còmhdhail nas cinntiche is nas earbsaiche

  • ceanglaichean bathair is ceanglaichean gu margaidh a leasachadh

  • ceanglaichean culturail is sòisealta a neartachadh

  • turasachd a leasachadh

  • cothrom nas fheàrr air goireasan slàinte is cùraim, is air foghlam is cosnaidhean

  • buannachdan dhan àrainneachd

Tha CnES ag ràdh gu bheil sgrùdadh air sealltainn gun cosgadh ceangal stèidhichte air Caolas na Hearadh eadar £109.6m is £145.1m.

Chosgadh e £135m a bharrachd bun-structar cumhachd ath-nuadhachail a chur ris - ach bhiodh cothroman airgead nach beag fhaighinn air ais san ùine fhada tro dhealan a reic dhan ghriod.

Dh'fheumadh na cosgaisean seo a chothromachadh an aghaidh na tha e a' cosg gus seirbheisean aiseig a chumail a' dol, thuirt iad.

Thuirt an t-ùgharras ionadail gum biodh iad airson co-chomhairleachadh mun chùis aig ìre na coimhearsnachd a dhealbh còmhla ri Còmhdhail Alba.

Chan eil taic a' nochdadh san fhreagairt airson drochaid air neo tunail gu tìr-mòr na h-Alba.

Tha CnES ag ràdh gu bheil trioblaidean le seirbheisean aiseig is adhair an-dràsta a' toirt droch bhuaidh air na h-Eileanan an Iar.

Tha iad ag ràdh ge-tà, gun gabhadh na trioblaidean seo a chur ceart le seirbheisean aiseig a tha aig ìre, còmhla ri seirbheisean adhair nas fheàrr agus faraidhean nas ìsle.

Thèid iarraidh a-nise air comhairlichean air Comataidh na Còmhdhail is a' Bhun-structair taic a chur ri freagairt na comhairle aig coinneimh Diciadain seo tighinn.