Naidheachdan 11:00m

Iran

Tha Iran ag ràdh gun deach amas air dà ghoireas gas agus air loidhne pìoba san dùthaich le ionnsaighean adhair, beagan uairean an uaireadair às dèidh don Cheann-suidhe Trump innse gun rachadh stad rè ùine a chur air an leithid. Tha am BBC a' tuigsinn gu bheil còmhraidhean air a bhith a' dol eadar na Stàitean Aonaichte agus Iran, ged a tha coltas ann gu bheil iad aig ìre uabhasach fhèin tràth.

Reeves

Tha a' mhì-chinnt mun chogadh san Ear-Mheadhanach a' toirt buaidh air prìs na h-ola agus i air a dhol os cionn £100 am baraille uair eile. Tha seo a' tighinn agus dùil ri fios bhon t-Seansalair mun bhuaidh a tha e a' toirt air an eaconomaidh an seo. Tha dùil cuideachd gum foillsich Rachel Reeves an seòrsa taic a bhios ri fhaighinn ma dh'fhaoidhte airson dachannan nuair a thig an cuibhreachadh a th' air prìsean gas is dealain an-dràsta gu crìoch san Ògmhios.

Dìon air coimhearsnachdan Iùdhach

Thuirt ceannard na buidhne poilis an aghaidh cheannairc san Rìoghachd Aonaichte gu bheil 200 oifigear a bharrachd gan cur gus dìon a chur air coimhearsachdan Iùdhach. Tha seo a' tighinn às dèidh mar a chaidh ceithir carbadan-eiridinn a bhuinneadh do choimhearsnachd Iùdhach ann an ceann a tuath Lunnainn a chur nan smàl ann an uairean beaga na maidne an-dè. Thuirt na poilis gu bheil iad a' dèanamh rannsachaidh feuch an robh gnothach aig buidheann Islamach le ceangal ri Iran ris an ionnsaigh sin.

Lighichean-sprèidh

Tha Ùghdarras na Farpais agus nam Margaidhean air planaichean fhoillseachadh feuch prìsean lighichean-sprèidh a dhèanamh nas cothromaiche. Bidh aca ri bhith nas fhollaisiche a thaobh nam prìsean aca agus bidh cuibhreachadh air cuid dhiubh. Tha seo a' tighinn às dèidh dha tighinn am follais gun robh prìsean ag èirigh a dhà uimhir nas luaithe na an atmhorachd. Tha dùil gun tèid iad seo a chur an sàs nas fhaide air a' bhliadhna.

Ealain

Tha dùil gum bhòt comhairlichean sna h-Eileanan an Iar an-diugh fhathast air plana gus atharrachadh mòr a thoirt air mar a tha iad a' cumail taic-airgid ris na h-ealain. Chaidh leasachadh a thoirt air na planaichean às dèidh cho mì-thoilichte 's a bha daoine mu na gearraidhean a chaidh fhoillseachadh roimhe. Ma thèid gabhail ris a' mhodail ùr mar a thathar an dùil, thèid maoin-airgid fhosgladh 'son tagraidhean cho tràth ris an ath-sheachdain.

Beathaichean

Tha na poilis air a' Ghàidhealtachd a' cur an cuimhne dhaoine an cuid chon a chumail fo smachd ma tha iad faisg air beathaichean, 's àrdachadh a' tighinn air an àireamh chùisean far an deach beathaichean a ruaigeadh sna beagan sheachdainean mu dheireadh. Tha iad gu seachd àraid a' sireadh fiosrachaidh mu mar a chaidh caora a mharbhadh agus agus tè eile a ghoirteachadh air talamh ionaltraidh ann an Geàrrloch uaireigin eadar 5:00f Dihaoine agus 6:30f Disathairne. Tha iad ag iarraidh air duine sam bith aig a bheil fiosrachadh a dhol thuca.