कोरोना महाराष्ट्र : अहमदनगरमधून तिसरी लाट सुरू होण्याचा धोका?

अहमदनगर जिल्ह्यातून कोरोनाची तिसरी लाट सुरू होऊ शकते असा इशारा नाशिकचे विभागीय आयुक्त राधाकृष्ण गमे यांनी दिला आहे. सध्या नगर जिल्ह्यात 5 हजारहून अधिक सक्रिय कोरोना रुग्णसंख्येची नोंद करण्यात आली आहे.

नगर जिल्ह्यातील कोरोना पॉझिटिव्हिटी रेट वाढला असून 5 टक्क्यांच्या पुढे गेला आहे. तसंच जिल्ह्यातून दररोज 800-900 पॉझिटिव्ह रुग्णांची नोंद होत आहे.

यासंदर्भात बोलताना राधाकृष्ण गमे म्हणाले, "या परिस्थितीमुळे तिसरी लाट नगरमधून सुरू होऊ नये यासाठी अधिकाऱ्यांशी चर्चा केली आहे. साधारण 100 गावांमध्ये प्रत्येकी 10 पेक्षा अधिक कोरोना रुग्ण आढळले आहेत. या गावांमधील गर्दीची ठिकाणं बंद करण्यास सांगितली आहेत. तरच तिथली परिस्थिती नियंत्रणात येईल. आठवडी बाजारसुद्धा बंद राहतील. कोरोना चाचणी करण्याचं प्रमाण वाढवण्याच्या सूचना दिल्या आहेत."

अहमदनगर जिल्ह्यातील किती लोकांना कोरोनाची लागण होऊन गेली आहे याची माहिती मिळावी यासाठी सिरो सर्वेक्षण केलं जाणार असल्याचंही ते म्हणाले.

यासंदर्भात जिल्हाधिकारी कार्यालयात नुकतीच एक आढावा बैठक पार पडली. कोरोनाच्या पार्श्वभूमीवर लागू करण्यात आलेल्या नियंमाचं उल्लंघन करणाऱ्यांवर कडक कारवाई करण्याचे आदेश यावेळी देण्यात आले.

संभाव्य तिसरी लाट येण्याची शक्यता वर्तवण्यात आली असून त्यानुसार हॉस्पिटल, ऑक्सिजन बेड्स, औषधांचा साठा तयार ठेवण्याच्या सूचनाही देण्यात आल्या आहेत.

पारनेर, संगमनेर आणि श्रीगोंदा तालुक्यातून रुग्णसंख्या मोठ्या प्रमाणात वाढत असल्याचं चित्र आहे.

आरोग्य विभागाच्या 20 सप्टेंबरच्या अहवालानुसार, अहमदनगर जिल्ह्यात एकूण 5,551 सक्रिय कोरोना रुग्ण आहेत. तर राज्यात सर्वाधिक सक्रिया रुग्णांची संख्या ही पुणे जिल्ह्यात आहे. पुण्यात सध्याच्या घडीला 11 हजार 193 सक्रिय रुग्ण आहेत. त्याखालोखाल ठाणे जिल्ह्यात 5 हजार 748 सक्रिय रुग्ण आहेत.

हे वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)