गुणरत्न सदावर्तेंची सुटका, हायकोर्टाचा अटकपूर्व जामीन

पुणे पोलिसांनी दाखल केलेल्या केसमध्ये अटकपूर्व जामीन हायकोर्टाने आज 26 एप्रिल रोजी मंजूर केला. आज त्यांना आर्थररोडमधून सोडण्यात आलं.

त्यांचा ताबा कोल्हापूर पोलिसांकडे होता. पुणे प्रकरणात अटकपूर्व जानीम मिळाल्यानंतर कोल्हापूर पोलिसांनी त्यांना जेल प्रशासनाकडे सुपूर्द केलं होतं. त्यानंतर त्यांच्या पत्नीने आज 26 एप्रिल जामीन अर्ज केल्यानंतर ते बाहेर आले.

गुणरत्न सदावर्तेंना सिल्व्हर ओक हल्लाप्रकरणी जामीन मंजूर

गुणरत्न सदावर्ते यांना शरद पवार यांच्या सिल्व्हर ओक निवासस्थान हल्ला प्रकरणात जामीन मंजूर करण्यात आला आहे.

एसटी कर्मचाऱ्यांनी 8 एप्रिलला राष्ट्रवादी काँग्रेसचे अध्यक्ष शरद पवार यांच्या घरावर चालून जात आंदोलन केल्यानंतर एसटी कर्मचाऱ्यांचे वकील अॅड. गुणरत्न सदावर्ते यांना पोलिसांनी अटक केली होती.

सुरुवातीला त्यांना दोन दिवसांची पोलीस कोठडी सुनावण्यात आली. नंतर त्यामध्ये टप्प्या टप्प्याने वाढ करण्यात आली होती. त्यामुळे गेल्या 15 दिवसांपासून गुणरत्न सदावर्तेंचा मुक्काम तुरुंगातच होता.

या प्रकरणात गुणरत्न सदावर्ते यांच्यासह 115 आंदोलक एसटी कर्मचाऱ्यांनाही जामीन देण्यात आला आहे.

सुनावणीदरम्यान काय घडलं?

या प्रकरणात सरकारी वकील म्हणून प्रदीप घरत यांनी बाजू मांडली. सुनावणीदरम्यान प्रदीप घरत म्हणाले, "MJT मराठी न्युज चॅनलचा पत्रकार सदावर्तेंच्या संपर्कात होता. सदावर्ते आणि या पत्रकारात चॅट आणि फोन झाल्याचे पुरावे आहेत. एक फोन नागपूरला करण्यात आला. त्याचं नाव कोर्टात सांगू शकत नाही."

"सहा महिन्यांपासून पैसे कुठून येतायेत याचा तपास करायचा आहे. एसटी कर्मचाऱ्यांकडून प्रत्येक 530 रूपये गोळा केले. दीड कोटी रूपये जमा करण्यात आलेत," अशीही माहिती प्रदीप घरत यांनी दिली.

तर पोलिसांनी कोर्टात माहिती दिली की, "हल्ल्याआधी एक बैठक झाली होती. यात सिल्व्हर ओकवर हल्ला करण्याचं ठरलं. एसटी कर्मचारी अभिषेक पाटील सदावर्तेंच्या संपर्कात होता. त्याने फोन करून काही पत्रकारांना बोलावलं होतं."

यावेळी गुणरत्न सदावर्तेंच्या वकिलांनी बाजू मांडली की, "पैशांबाबत कर्मचाऱ्यांनी तक्रार केलेली नाही. कर्मचारी आत्महत्या करत होते, मात्र कोणलाही साधी सहानुभूतीही नव्हती. कर्मचाऱ्यांचा हेतू लक्षात घ्या, त्यांना कोणता गंभीर गुन्हा करायचा नव्हता. तुम्हाला नक्की काय शोधायचं आहे, 530 रूपये गोळा केले ते की? काय?"

दोन दिवसांपूर्वी सदावर्ते यांना पोलीस कोठडी सुनावल्यानंतर गृहमंत्री दिलिप वळसे पाटील यांनी माध्यमांशी संवाद साधला होता. त्यावेळी ते म्हणाले होते, "एसटी कर्मचाऱ्यांनी आता सहकार्याची भूमिका घ्यावी. झालेल्या प्रकाराचा आम्ही सखोल तपास करत आहोत. शरद पवार आणि त्यांच्या कुटुंबीयांचं सुरक्षा वाढवण्यात आल्याचं त्यांनी सांगितलं."

सिल्व्हर ओकवर नेमकं काय घडलं होतं?

शुक्रवारी दुपारी 3 वाजण्याच्या सुमारास एसटी कर्मचारी अचानक शरद पवारांच्या बंगल्याबाहेर पोहोचले. तिथं त्यांनी 'शरद पवार, हाय हाय' अशा घोषणा दिल्या.

तसंच चप्पल आणि दगडफेक करण्यात आली. सुप्रिया सुळे यांनीसुद्धा त्यांच्या घरावर दगडफेक झाल्याचं मान्य केलं आहे.

"शरद पवार हे जनतेचे सेवक आहेत. पण, आमच्या 120 आत्महत्या झाल्यात. तरीही हे बघायला तयार नाहीत. हेच का जाणते राजे? कोर्टाच्या निकालाची वाट सरकारला का पाहावी लागली? आमच्या 120 आत्महत्यांना शरद पवार, अजित पवार जबाबदार आहेत," असं एका आंदोलक कर्मचाऱ्यानं एबीपी माझाशी बोलताना म्हटलं.

काही आंदोलकांनी जय श्रीरामच्या घोषणाही दिल्या.

"एसटी कर्मचाऱ्यांच्या संपाला आज अचानक जे अनिष्ट वळण लागले ते अनुचित आहे. राष्ट्रवादी काँग्रेस पक्षाचे राष्ट्रीय अध्यक्ष आदरणीय पवार साहेबांच्या मुंबईतल्या निवासस्थानाबाहेर झालेली निदर्शने अस्थानी आणि अनाठायी आहेत. कर्मचाऱ्यांच्या भावना भडकावणारे कोण हे सर्वश्रुत आहे," असं गृहमंत्री दिलिप वळसे पाटील यांनी ट्वीट करून म्हटलं आहे.

तर "पवार साहेबांच्या घरावर अशा प्रकारे दगडफेक होणे हे अत्यंत निंदनीय कृत्य असून, आम्ही याचा तीव्र शब्दांत निषेध करतो. पोलिसांनी या दगडफेकीच्या मागचे कर्ते करविते जे कोणी लोक असतील त्यांना आणि दगडफेक करणाऱ्या लोकांना ताब्यात घेऊन त्यांच्यावर कडक कारवाई करावी," अशी मागणी जयंत पाटील यांनी केली आहे.

"ज्येष्ठ नेते शरद पवार साहेब यांच्या निवासस्थानी झालेली घटना सर्वथा चुकीची आहे. नेते कुठल्याही पक्षाचे असोत, घरांवर अशी आंदोलने अजीबात समर्थनीय नाहीत. मी या घटनेचा तीव्र निषेध करतो.

"गेल्या 5 महिन्यांहून अधिक काळपासून एसटी कर्मचारी आंदोलन करीत आहेत. त्यांच्या व्यथा, मागण्या योग्यप्रकारे व योग्य व्यासपीठावरच मांडल्या जाव्यात आणि त्या ऐकून घेतल्या जाव्या, अशी अपेक्षाही या निमित्ताने व्यक्त करतो," अशी प्रतिक्रिया विरोधी पक्षनेते देवेंद्र फडणवीस यांनी म्हटलं होतं.

एसटी कर्मचाऱ्यांचं आंदोलनाचे सहा महिने

ऑक्टोबर महिना अखेरीस एसटी कर्मचाऱ्यांनी राज्यभर बेमुदत संप सुरू केला. त्यानंतर राज्य सरकारने महागाई भत्ता 12 टक्क्यांवरून वाढवून 28 टक्के केला.

घरभाडं भत्ता वाढवण्याचीही घोषणा करण्यात आली. एसटी कर्मचाऱ्यांच्या इतर मागण्यांविषयी दिवाळीनंतर चर्चा करू असं परिवहन मंत्री अॅड. अनिल परब यांनी म्हटलं होतं.

पण एसटी महामंडळाचं शासनात विलीनीकरण करण्यात यावं यासाठी एसटी कर्मचाऱ्यांच्या एका संघटनेनं आंदोलन सुरू ठेवलंय.

अॅड. गुणरत्न सदावर्ते कोण आहेत?

गेल्या काही वर्षांपासून अॅड गुणवरत्न सदावर्ते चर्चेत आले आहेत. मराठा आरक्षणाच्या विरोधात दिलेला कायदेशीर लढा असो की सध्या सुरु असलेल्या एसटी कर्मचाऱ्यांच्या आंदोलनात त्यांनी घेतलेली उडी असो. सदावर्ते यांनी अशा अनेक केसेस न्यायालयात लढल्या आहेत.

अॅड. गुणरत्न सदावर्ते हे मूळचे नांदेडचे आहेत. त्यांनी त्यांचं शिक्षण ओरंगाबाद आणि मुंबईतून झालं आहे. विविध सामाजिक चळवळींमध्ये ते नेहमीच पुढे असायचे. त्यांनी नांदेडला 'सम्यक विद्यार्थी आंदोलन' ही संघटना सुरू करुन या माध्यमातून विद्यार्थ्यांचे प्रश्न त्यांनी मांडले होते.

पुढे सदावर्ते मुंबईत स्थायिक झाले आणि मुंबईत वकिली करू लागले. त्यांनी भारतीय राज्यघटनेवर पीएचडी केली आहे. मॅटच्या बार असोसिएशनचे ते दोनदा अध्यक्ष राहिले आहेत. ते बार कॉऊंसिलच्या शिखर परिषदेवर देखील होते.

मराठा आरक्षण असंवैधानिक असल्याची याचिका न्यायालयात दाखल करणाऱ्या अॅड. जयश्री पाटील या सदावर्ते यांच्या पत्नी आहेत. त्यांना झेन नावाची मुलगी आहे.

22 ऑगस्ट 2018 रोजी परळच्या क्रिस्टल प्लाझा या इमारतीला आग लागली होती. त्यावेळी 10 वर्षाच्या झेन सदावर्ते हिने तिथे अडकलेल्या लोकांना सावधगिरीचे उपाय सुचवले. त्यामुळे 17 जणांचे प्राण वाचले होते. तिच्या या कार्याबद्दल तिला राष्ट्रपतींच्या हस्ते राष्ट्रीय शौर्य पुरस्कार देखील प्रदान करण्यात आला आहे.

केवळ मराठा आरक्षाणावरील याचिकाच नाही तर अंगणवाडी सेविकांमुळे मुलांची होणाऱ्या आबाळाची केस, ज्येष्ठ नागरिक कायदा लागू करण्याची केस, मॅटच्या माध्यमातून चार हजार परिचारिकांना नोकरीत कायम करण्याची केस, हैद्राबाद उच्च न्यायालयात रोहित वेमुला प्रकरणात चौकशीची मागणी करणारी याचिका अशा अनेक केसेस सदावर्ते यांनी लढवल्या आहेत.

हे वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)