MC तोडफोड: रॅपर धर्मेश परमारचं 24 व्या वर्षी निधन, असा होता शेवटचा परफॉर्मन्स

'गल्ली बॉय'फेम 'एमसी तोडफोड' अर्थात रॅपर धर्मेश परमारचं निधन झालं आहे. धर्मेश 24 वर्षांचा होता.

मुंबईतील स्ट्रीट रॅपर आणि त्यातही गुजराती गीतांसाठी धर्मेश परमार प्रसिद्ध होता.

रणवीर सिंह आणि आलिया भट्ट यांच्या प्रमुख भूमिका असलेल्या 2019 सालच्या 'गल्ली बॉय' सिनेमात साऊंडट्रॅक आर्टिस्ट म्हणून धर्मेशनं काम केलं होतं.

धर्मेश हा मुंबईस्थित स्वदेसी मूव्हमेंट या हिप-हॉप ग्रुपचा सदस्य होता. एमसी तोडफोड नावानं तो प्रसिद्ध होता. गल्ली बॉयमधील 50 रॅपर्सपैकी एक धर्मेश होता.

अभिनेता रणवीर सिंग, सिद्धांत चतुर्वेदी, झोया अख्तर यांनी इन्स्टाग्रामवरून धर्मेशला श्रद्धांजली अर्पण केली.

रणवीर सिंगनं इन्स्टाग्राम स्टोरीत धर्मेचा फोटो ठेवून, त्यावर दु:ख व्यक्त करणारी इमोजी पोस्ट केलीय, तर सिद्धांत चतुर्वेदीने धर्मेशच्या फोटोवर #RIPbhai म्हटलंय.

तर झोया अख्तरनं धर्मेशचा फोटो इन्स्टाग्रामवर पोस्ट करत म्हटलंय की, "तू खूप लवकर गेलास. या आयुष्यात आपण भेटल्याचं मला माझं भाग्य वाटतं."

...असा होता शेवटचा परफॉरमन्स

स्वदेसी मूव्हमेंटने त्यांच्या अधिकृत इन्स्टाग्राम अकाऊंटवर दोन दिवसांपूर्वी एक व्हिडिओ पोस्ट केला आहे. या पोस्टनुसार, 'स्वदेसी मेळा' कार्यक्रमात एमसी तोडफोड' अर्थात रॅपर धर्मेश परमारने शेवटचा परफॉरमन्स दिला.

यात त्यांनी असंही म्हटलंय, "एमसी तोडफोडचा परफॉरमन्स पाहण्यासाठी तुम्ही तिथे हवे होतात, लाईव्ह संगीतासाठीचं त्याचं प्रेम तुम्हाला अनुभवता आलं असतं. तुला आम्ही कधीही विसरणार नाही, संगीताच्या माध्यमातून तू कायम आमच्या स्मरणात राहशील."

त्याच्या रॅपचे काही बोल सुद्धा 'स्वदेसी मूव्हमेंट'ने पोस्ट केले आहेत. 'कभी सोचू कहीं चले जाने की दूर, कोई ठिकाने बस जो जो न हो ज्यादा मशहूर, जहां ले जाती रहे मन को भाए वो में करू, ऐसा जीना रहना किया जाने याही से शुरू - तोडफोड'

हे वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)