पंकजा मुंडे- 'मला संपवायचे प्रयत्न झाले, पण मी संपले नाहीये'

'मला मंत्री करा, माझ्या बहिणीला मंत्री करा, माझ्या कुटुंबाला काहीतरी द्या हे गोपीनाथ मुंडेंचे संस्कार नाहीत,' असं विधान भाजप नेत्या पंकजा मुंडे यांनी केलं आहे.

'माझा परिवार म्हणजे माझी बहीण नाही, माझा परिवार महाराष्ट्राच्या कानाकोपऱ्यात पसरला आहे,' असंही पंकजा यांनी म्हटलं.

मुंबईमध्ये त्या कार्यकर्त्यांशी संवाद साधत होत्या.

पंकजा मुंडे या रविवारी (11 जुलै) दिल्लीला आल्या होत्या. प्रीतम मुंडे यांना डावलून भागवत कराड यांना मंत्रिपद दिल्यामुळे पंकजा मुंडे नाराज असल्याची चर्चा होत होती. दिल्ली भेटीत पंकजा यांनी भागवत कराड यांची भेट घेतली होती.

"प्रीतम मुंडेंना मंत्रिपद न मिळाल्याने मी नाराज नाही. पंकजा आणि प्रीतम यांनी मंत्रिपदाची कधीच मागणी केली नव्हती," असं त्यांनी या भेटीनंतर म्हटलं होतं.

दिल्लीहून परतल्यानंतर आज (13 जुलै) त्यांनी कार्यकर्त्यांशी संवाद साधला.

"माझ्या वडिलांनी ज्या लोकांसोबत संघर्ष केला, त्यांच्यासाठीच त्यांनी मला राजकारणात आणलं. त्यांच्यासाठीच मी राजकारणात आहे.

मी कधीही मला अमुक द्या असं म्हटलं नाही. संघर्षयात्रेत लोकांनी त्यांची इच्छा व्यक्त केली होती. मला कोणाचं नेतृत्व असणार हे माहीत होतं. मग मी मंत्रिपदासाठी मी राजीनामा का देईन?" असंही पंकजा यांनी म्हटलं.

Skip सर्वाधिक वाचलेले and continue reading
सर्वाधिक वाचलेले

End of सर्वाधिक वाचलेले

'आपण आपलं घर का सोडायचं? राजीनामा का द्यायचा? मी कार्यकर्त्यांच्या राजीनाम्यावर स्वार होणारी नाहीये, असंही पंकजा यांनी म्हटलं.'

सर्व कार्यकर्त्यांचे राजीनामे आपण नामंजूर करत असल्याचंही त्यांनी म्हटलं.

पंकजा यांच्या भाषणातले महत्त्वाचे मुद्दे-

  • मी दबाव आणण्यासाठी दिल्लीला गेले, असं अनेकांनी म्हटलं. आता मंत्रिमंडळ स्थापन झालं. शपथविधी झाला. आता मी दबाव निर्माण करून काय करू?
  • मी निवडणूकीत हरले असले तरी खचले नाही. जर मी संपले असले तर मला संपवायचे प्रयत्नही संपले असतील.
  • प्रीतम मुंडे पूर्णपणे सक्षम असताना त्यांना मंत्री पद नाही मिळालं. भागवत कराडांना मिळालं. माझं वय 42 भागवत कराडांचं वय 65 आहे. 65 वयाच्या माणसाचा अपमान करण्याचे माझे संस्कार नाहीत
  • मला अनेकजण म्हणतात तुम्ही 'महाराष्ट्राच्या मनातली मुख्यमंत्री' म्हटलं म्हणून सगळं अवघड झालं. मी भाजपची मुख्यमंत्री होणार असं म्हटलं होतं, मला मुख्यमंत्री व्हायचंय असं म्हटलं नव्हतं. इथे लोक देशाचा पंतप्रधान व्हायचंय म्हणतायत ते चालतं?
  • मी सगळं भोगलय. नको ते आरोप-प्रत्यारोप भोगले आहेत. कारण मी कोणालाच भीत नाही, हा माझा प्रॉब्लेम आहे.
  • माझी इच्छा आहे धर्मयुद्ध टाळावं. याचं कारण या युद्धात माझे सैनिक आडवे पडतात.
  • माझे नेते मोदी, अमित शहा आहेत. ज्यांना मी काय करते हे सांगायचे आहे ते आता जे. पी. नड्डा आहेत.

हे वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)