मराठा आरक्षण : विनायक मेटे यांच्या नेतृत्वात बीडमध्ये मोर्चा, आंदोलकांची मोठी गर्दी

मराठा आरक्षणाच्या मागणीसाठी शिवसंग्रामचे नेते आणि विधान परिषदेचे आमदार विनायक मेटे यांनी बीडमध्ये मोर्चाचं आयोजन केलं आहे. या मोर्चाला विनायक मेटेंसह मोठ्या संख्येनं कार्यकर्त्यांनी हजेरी लावलीय.

या मोर्चासाठी परवानगी देण्यात आलेली नाही, जर मोर्चा निघाला तर त्यावर आम्ही कारवाई करूत असा इशारा बीड जिल्ह्याचे पोलीस अधीक्षक आर. राजा यांनी सकाळी दिला होता.

बीडच्या छत्रपती शिवाजी महाराज चौकात मोठ्या संख्येत आंदोलकांची गर्दी झालीय. याच चौकातून हा मोर्चा सुरू झालाआहे.

छत्रपती शिवाजी महाराज चौक ते जिल्हाधिकारी कार्यालय असा या मोर्चाचा मार्ग आहे.

कोव्हिड-19 चं संकट टळलं नसताना, परिस्थिती अद्याप नियंत्रणात नसताना, अशी गर्दी जमल्यानं काळजी व्यक्त करण्यात येत आहे.

"पोलिसांनी किंवा कुणीही कितीही विरोध केला, तरी मोर्चा निघणार म्हणजे निघणार," असं म्हणत विनायक मेटे यांनी या मोर्चाला सुरुवात केलीय.

आजच (5 जून) विनायक मेटे यांनी मोर्चासाठीची आचारसंहिता त्यांच्या फेसबुक पेजवरून जाहीर केली होती.

याआधी भाजप नेते नारायण राणे यांनी मराठा समाजाने आरक्षणासाठी मराठा समाजाने आंदोलन करावे असं म्हटलं होतं.

"मराठ्यांनी आता महाविकास आघाडी सरकारला कारभार करता येणार नाही, असं तीव्र आंदोलन करावं," असं नारायण राणे म्हणाले होते.

हे वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)