रेल्वे स्टेशनच्या टीव्ही स्क्रिनवर सुरू झाली पॉर्न फिल्म

पटणा जंक्शन रेल्वे स्टेशनवरील एका टीव्ही स्क्रिनवर रविवारी (19 मार्च 2023) अचानक पॉर्न फिल्म (अश्लील चित्रपट) चालू झाली.

बिहारची राजधानी पटणा शहरातलं पटना जंक्शन हे प्रमुख रेल्वे स्टेशन आहे.

या घटनेनंतर संबंधित एजन्सीचं टेंडर रद्द करण्यात आल्याची माहिती रेल्वे प्रशासनाने दिली आहे.

रेल्वे संपत्तीचं संरक्षण करणाऱ्या रेल्वे पोलीस बल (RPF) आणि रेल्वे परिसरात कायदा व सुव्यवस्थेचं काम पाहणाऱ्या GRP ला या प्रकरणाची माहिती देण्यात आली आहे.

ही घटना रविवारी सकाळी दहा वाजण्याच्या सुमारास घडली.

या दरम्यान, तब्बल तीन मिनिटे रेल्वे स्टेशनच्या टीव्ही स्क्रिनवर पॉर्न फिल्म सुरू होती.

यानंतर रेल्वे प्रशासनाने टीव्ही स्क्रिनचं कामकाज पाहणाऱ्या कंपनीला फोन करून याची माहिती दिली. त्यानंतर पॉर्न फिल्म बंद करण्यात आली.

पूर्व मध्य रेल्वे प्रवक्त्यांच्या मते, RPF ने या प्रकरणी FIR दाखल केला असून पुढील तपास सुरू आहे.

रेल्वे स्टेशनवर टीव्ही स्क्रिनच्या माध्यमातून जाहिरात आणि माहितीपर व्हीडिओ चालवण्यासाठी वापरल्या जाणाऱ्या सगळ्या वस्तू आता RPF ने ताब्यात घेतल्या आहेत.

खरं तर, देशभरातील सर्वच प्रमुख रेल्वे स्थानकांवर टीव्ही स्क्रिनच्या माध्यमातून सरकारी माहिती प्रवाशांपर्यंत पोहोचवली जाते.

याशिवाय, स्क्रिनवर जाहिरातींचंही प्रसारण केलं जातं. त्यामुळे साधारणपणे टेंडरच्या माध्यमातून एखाद्या खासगी कंपनीला याचं कंत्राट देण्यात येतं.

हे कंत्राट मिळवणाऱ्या कंपन्या या जाहिराती आणि माहितीपर व्हीडिओ चालवण्याचं काम करतात.

काही वर्षांपूर्वी पुण्यातही सार्वजनिक स्क्रिनवर अशा प्रकारे अश्लील चित्रपट चालवण्याचा प्रकार समोर आला होता.

त्यावेळी पुण्यातील गजबजलेल्या नळ स्टॉप चौक परिसरातील एका स्क्रिनवर अश्लील फिल्मची वेबसाईट सुरू असल्याचं दिसून आलं होतं. त्यावेळी या प्रकरणाची बरीच चर्चा माध्यमांमध्ये झाली होती.

हेही वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता. 'गोष्ट दुनियेची', 'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)