Ihe Chinyere Udoma kwuru gbasara ịgba alụkwaghịm

Otu n'ime ndị a ma ama na-eti egwu ụka na Naịjirịa, ọkachasị na mpaghara Ọwụwa anyanwụ bụ Chinyere Udoma akọwaala etu Lucky Dube siri kpalite mmụọ ya iti egwu.

Nwaanyị ahụ a mụrụ na Nnokwa ma lụọ ya n'Ado dị n'Anambra steeti kwuputara nke a oge BBC News Igbo gbara ya ajụjụ pụrụiche.

Ọ sịrị "Lucky Dube kpalitere mmụọ m ebe ọ dị ukwuu. Anaghị m ege etu egwu ya si ada kama ihe m na-ege bụ ahịrị egwu ya".

"Ọ na-abụ m na-ege egwu ya oge ụfọdụ, m malite ịkwa akwa. Ndị mmadụ na-ajụ ihe mere egwu na-abụghị egwu ụka ji eme ka m na-akwa akwa. Ọ bụrụ ma gị tọọ ntị n'ala nụrụ ihe Lucky Dube na-agụ n'egwu ya, ị ga-achọpụta na e nwere ihe dị omimi egwu ya na-akọwa karịa ụda ya," ka Udoma gwara anyị

O kwukwara na ndị ọzọ soro kpalite mmụọ ya iti egwu bụ Onyeka Onwenu na Sunny Okosun.

Chinyere Udoma kọwara ihe o chere mere ndị na-eti egwu ji akpọ ya 'Odudu Woman'.

Ọ sịrị, "ikekwe ya abụrụ maka na eburu m nnukwu ibu. Oge ụfọdụ, ana m echekwa na ọ bụ maka na ha chere na m nwere ego. Alụrụ m ọgụ ya, ike agwụ m, m malitezie ịza ya ka udo dị."

Ụfọdụ mmadụ chere na ọ bụ onye na-eme mpako mana nwaanyị ahụ malitere iti egwu kemgbe ihe karịrị afọ iri atọ na ise (35) kwuru na ọ bụghị nganga ka ọ na-eme kama ọ na-ere ure n'ime Chineke maka ọtụtụ ihe ọma Chukwu meere ya.

Ochie dike ahụ na-eti egwu sịrị na ọ naghị ede egwu kama ọ bụ mmụọ nsọ na-enye ya egwu ma na-enyekwa ya ntụziaka gbasara oge ọ ga-ewepụta ha. Nke a ka o kwuru mere egwu ya niile ji apụ iche.

Udoma rụtụkwara aka n'ụdịrị egwu ha na-etipụta n'oge ochie na ndị nke ha na-etipụta n'oge ugbua.

N'okwu ya: "Etu mbụ anyị si etipụta egwu bụ ya bụ abụ ofufe, nke ndị ụka Anglịkan na-akpọ ofufe nro, abụ otuto. Ị ma na ịgụ egwu dị iche n'ịbụrụ Chineke abụ. Ọ bụ oge ahụ ka egwu nwere ihe ọ na-akọwa, nke bụ na ị na-agụ ya, eluigwe emeghee".

O kwuru na ụdịrị egwu ha na-eti ugbua bụ nke ha ji adọtara Chukwu ọgbọ nke dị ugbua.

Ọ sịrị "oge ụfọdụ m na-ajụ ma ọ bụzikwa egwu ụka ka anyị na-eti. Mana ọ tọkwara ụtọ ma bụrụ nke na-enye ụmụ ọgbara ọhụrụ ọṅụ pụrụ iche. N'uche m, ihe ọbụla a ga-eme iji dọtara ha Chukwu, ana m akwado ya".

"Ihe anyị na-emezi bụ ịkpatụ aka n'ụda egwu anyị, ọ bụghị ozi anyị na-ezi n'ime ya. Anyị na-eme ya ka ọ dabara ọgbọ dị ugbua, ka ha nwee ike jiri ya bịaruo Chukwu nso," ka Udoma kọwara.

Chinyere Udoma kwukwara okwu gbasara onye ya na ya sooro mepụta ụfọdụ egwu bụ Ndidiamaka.

Ọ kọwara na Ndidiamaka bụ ezigbo enyi ya ma bụrụkwa onye ya na ya na-emekọta ihe egwu mana ọ naghị eti egwu.

"N'oge mbụ, mmadụ nwereike tipụta ọtụtụ efere egwu mana ihu ya pụta na ha niile, ọ gaghị ere ahịa. Mana i were foto onye ọzọ tinye n'ihu efere egwu gị ndị ọzọ, ndị mmadụ azụrụ ya na-amaghị na ọ bụ gị tipụtara ha".

"Ebumnobi anyị n'oge ahụ bụ iji foto ndị ọzọ wepụta egwu dị iche iche ndị m tipụtara. Ọ bụ di Ndidiamaka nwe ụlọọrụ na-ekesara m egwu oge ahụ nke mere o jiri gbaa mbọ itinye nwunye ya ka ihu ya nwee ike pụta n'egwu m," ka Odudu Woman kọwara.

Gbasara ịgba alụkwaghịm, Chinyere Udoma kwuru na ọ naghị akwado nkewa n'etiti di na nwunye, ọkachasị oge ha mụrụ nwa.

"N'uche m, akwadoghị m ịgba alụkwaghịm mana ọ bụrụ na ị chọpụta na nke gị adabaghị, aga m asị ka ị pụta. Ọ ka mma ka mmadụ abụọ ahụ dị ndụ kọọ ka ha na ije siri gaa" bụ ndụmọdụ Chinyere Udoma.