Nnamdi Kanu trial: Etu o si aga n'Ọwụwa Anyanwụ taa

Ebe niile tọgbọrọ chakoo ọzọ na mpaghara Ọwụwa Anyanwu taa maka atụmatụ 'sit at home' nke ndị Indigenous People of Biafra (Ipob) hibere.

Atụmatụ nọrọ n'ụlọ ahụ bụ maka ikpe onye ndu ha Nnamdi Kanu nke gọọmentị etiti nwụchiri ma na-ekpe ikpe maka ebubo iyi ndụ egwu.

Ọtụtụ ndị mmadụ gwara BBC na ha apụtaghị ezi chacha maka egwu ihe nwereike ime ha ma ha pụta ezi.

Nke a bụ maka na ndị na-amanye ịnọrọ n'ụlọ egbuola ọtụtụ ndị mmadụ na mbụ ma gbakwa ngwaahịa ndị mmadụ ọkụ iji manye iwu ịnọrọ n'ụlọ.

Agbanyeghi na ndị isi otu Ipob bụ ndị na-achọ nnwereonwe Biafra ekwuola na ha anaghị amanyezi ịnọ n'ụlọ ha kpọburu ma gọọkwa na ha agaghị akpọkwa ọzọ, ndị mmadụ ka na-erube isi ịnọ n'ụlọ.

Nke izu a bụ nke ha sị aga-eji ụbọchị atọ wee manye site Monde 17 Jenụwarị ruo Wenezde 19 Jenụwarị, 2022.

Ndị otu Indigenous People of Biafra (Ipob) hibere ịnọrọ n'ụlọ maka ụbọchị ọbụla aga-ekpe ikpe Nnamdi Kanu n'Abuja.

Ndị ntaakụkọ BBC gagharịrị mpaghara dị iche iche n'Ọwụwa Anyanwụ, wee hụ na ọtụtụ ụlọahịa, ọdọmmanụ ụgbọala, ụlọakwụkwọ, ụlọakụ na ebe ndị ọzọ emepeghi.

Ụfọdụ ndị a gbara ajụjụ ọnụ n'Abịa steeti kwuru sị na e mechiri ụlọakwụkwọ n'ihi ya bụ 'sit at home', ndị ọzọ kwuru na ha agaghịdị ekwe ụmụ ha pụọ n'ụlọ taa.

Etu o si aga n'Ọwụwa Anyanwụ n'ụbọchị 18 nke ọnwa Jenụwarị 2022

N'Anambra steeti

N'Abịa steeti,

N'Imo steeti,

N'Ebonyi,

N'Enugwu steeti

Gịnị butere 'sit at home' ndị Ipob hibere?

Ndị otu Ipob malitere ịnọ n'ụlọ ha kpọrọ 'sit at home' mgbe gọọmentị etiti Naịjiria nwụchiri Kanu bụ onyendu ha, n'afọ 2021.

Ha tinyere ya bụ ịnọ n'ụlọ na mpaghara Ọwụwa Anyanwụ Naịjiria iji gosi nkwado ha maka ikpe Kanu.

N'afọ 2021, ha tinyere ya bụ ịnọ n'ụlọ kwa Mọnde ọbụla, mana ha mechara na-eme ya mgbe ọbụla Kanu kwesịrị ịpụta n'ụlọikpe.

Cheta na gọọmetị Naịjirịa nwụchiri Nnamdi Kanu bụ onye ndụ otu Ipob na na mba Kenya n'afọ 2021 ebe ọ gbara ọsọ n'afọ 2017 mgbe ndị agha Naịjirịa wakporo ụlọ ya n'Afaraukwu Abia steeti.

Kamgbe e si mba Kenya kpọlata ya Naịjirịa, a na-ekpe ya ikpe maka ebubo iyi ndụ egwu nke gọọmentị Naịjirịa na-ebo ya.

Ihe ndị Igbo welitere isi na-ekwu maka atụmatụ 'sit at home'

'Ipob bikonu ka anyị were ụkwụ chọwa ihe anyị dabara na mmiri' - MbazulikeAmaechi

Mbazuluike Amaechi bụ otu onye na ndị so Zik zọta nwereonwe Naijiria ma bụrụkwa mịnịsta njem ụgbọelu mbụ na Naịjirịa kwuru na atụmatụ 'sit at home' na-emebi akụnaụba ala Igbo.

Ka ọ na-akatọ ya bụ atụmatụ, o kwuru na o nwere ike imebi mkparịtaụka na-aga n'ihu maka ntọghapụ onye ndu Indigenous People of Biafra bụ Nnamdi Kanu.

Ọ gwara BBC Igbo na ọ kpokuola ọkaiwu Nnamdi Kanu bụ Ifeanyi Ejiofor ma kọwara ya mwute ya gbasara etu ụfọdụ ndị kpọrọ onwe ha ndị Ipob si akpa mkpamkpa n'ala Igbo.

Ọ gara n'ihu rịọ ndị otu Ipob arịrịọ ka ha kwụsị okwu maọbụ agwa ọbụla ga-eme ka ntọghapụ Nnamdi kanu raa ahụ.

N'okwu ya, "ọ bụrụ na ha ewelataghị aka, a ga m akwụsị mbọ m na-agba."

"Makana ọ baghị uru na m na-etinye ndụ m na nsogbu, ọ ka mma na m nọ na-akara onwe m nka."

Onye bụ Mbazulike Amaechi?

Ọ bụ mịnịsta njem Ugbọelu mbụ Naijiria n'afọ 1962 ruo 1966.

Ọ bụ onye 'Zikist'- ndị soro Nnamdi Azikiwe were lụọ ọgụ nnwereonwe Naijiria.

Ọ na-akatọkarị etu e si emegbu ndị Igbo ma na-enye ndụmọdụ ihe ndị a ga-eme iji nweta ogbugbo mmegbu a.

Etu 'sit at home siri gaa n'abalị 17 ọnwa Jenụwarị?

Ndị bi a mpaghara ọwawa Anyanwụ nọkwara n'ụlọ ụbọchị Mọnde abalị 17 ọnwa Jenụwara maka ikpe Nnamdi Kanu ga-ewe abalị abụọ n'izu a.

Ọtụtụ ndị mmadụ nọbụ na mgbagwoju anya ma a g-anọ n'ụlọ ka a gaghị anọ n'ụlọ.

N'abalị 17 ọnwa Jenuwarị, ndị mmadụ apụtaghị n'ụzọ chacha.

Nke a bụ na-agbanyeghi na ndị otu Indigenous People of Biafra (Ipob) kwuru na ha etinyeghi 'sit at home' n'izu niile.

N'agbanyeghi na ha kwuru na ha etinyeghi mmachi ọbụla, ndị mmadụ ka na-ehi asaa n'anya.

N'Enugwu,

Ụzọ dị iche iche tọgbọ chakoo n'isiobodo steeti a, dịka ọtụtụ ndị mmadụ apụtabeghi ịgara mkpa ha.

N'agbanyeghi na ọ bụ ụtụtụ Mọnde, ụfọdụ ebe ndị na-ekwokarị ekwo tọgbọ chakoo.

N'Abịa,

N'agbanyeghi na ndị ụfọdụ ụgbọala na-agba n'ụzọ n'ụtụtụ a n'Ụmụahịa, isiobodo Abịa steeti, ụfọdụ ndị ekwebeghi apụta ezi.

Ụfodụ ndị ekweghi agbape ọnụụlọahịa ha, ebe ndị nke mepere emepe ji otu ụkwụ kwụrụ.

N'aka nke ọzọ, ụlọakụ, ọdọmmanụ ụgbọala nakwa ụlọakwụkwọ mepere emepe.

N'Imo,

Ndị mmadụ na-agagharị mkpa ha n'isiobodo steeti ahụ n'ụtụtụ Mọnde a.

Ahịa na-azụ, ndị ọrụ na-aga ọrụ ha, ụlọakụ mepere emepe, mana ụfọdụ ndị ahịa emepeghi ọnụụlọahịa ha.

N'Anambra

Ụkwụ na-aga etu o kwesịrị n'ụfọdụ mpaghara Ọka, isiobodo Anambra steeti, n'ụtụtụ Mọnde a.

Mana n'agbanyeghi nke a, ụfọdụ ọdọụgbọala na ọdọmmanụ ụgbọala mechiri emechi, ahịa ndị dị ka Eke Ọka anaghịkwa azụ etu o kwesịrị n'ụtụtụ a.

N'Ebonyi,

Ndị mmadụ na-agara mkpa ha n'isiobodo Abakaliki n'ụtụtụ a.

Ụlọakwụkwọ, ụlọakụ, ahịa na ụlọọrụ mepechara emepe.