The Nigerian Nightmare: Lee Kamaru Usman, dimkpa Naịjirịa nwere 'single bone'

Aha mmadụ niile ọbụla kpụ n'ọnụ ugbua bụ Kamaru Usman, nwaafọ Naịjirịa ji ọgụ eme nri.

Usman na Colby Covington chịpụrụ ya n'isi ụtụtụ Sonde n'ọgụ UFC.

Ha na-azọ mgbanukwu nke 'welter weight' division.

Mana Usman ji ọkpọ kụwachaa Covington ọnụ ma maburu ya bụ mgbanukwu lawa.

Nke a pụtara na ọbụ Usman bụ naanị Eze ga-akwụ ọtọ na ogogo 'welter weight' nke UFC.

Onye bu Kamaru Usman?

A mụrụ Kamaru Usman n'Auchi, Edo steeti Naịjirịa n'afọ 1987.

Nna ya jiburu ọkwa 'Major' n'otu ndị agha Naịjirịa, ebe nne ya bụ onye nkuzi.

Ọ gafere mba Amerịka n'afọ 1995 oge ọ dị afọ asatọ.

Usman malitere egwuregwu ịgba mgba oge ọ banyere ụlọakwụkwọ sekọndịrị na Bowie High School, Arlington, ma bụrụkwa ọkaibe na mgba oge ọ banyere mahadum Nebraska.

N'afọ 2015, Usman banyere asọmpi a kpọrọ 'The Ultimate Fighter', ebe ọ nọ turu ugo wee banyezia 'Ultimate Fighting Championship' (UFC).

Kamgbe ọ malitere ịlụ ọgụ na UFC, onwebeghị onye meriri ya ruo taa.

Ụmụ Naịjirịa ndị ọzọ nọkwa n'asọmpi UFC

Isreal Adesanya bụkwa nwaafọ Naịjirịa ọzọ a ma ama n'egwuregwu UFC.

Adesanya hapụrụ Legọs ebe a mụrụ ya gafee Ghana n'afọ 1999, si ebe ahụ gafee mba New Zealand ebe ọ nọ malite egwuregwu ịlụ ọgụ.

Ugbua, ọ bụ Adesanya bụ ọkaibe n'ogogo 'middleweight' nke UFC.

Ndị Naịjirịa ọzọ so n'asọmpi UFC gụnyere Sodiq Yusuf na Kennedy Nzechukwu.

Akụkọ ndị ọzọ ga-amasị gị:

Ihe nkiri ga-amasị gị: