Juventus ta kori kocinta Maurizio Sarri
Asalin hoton, Getty Images
Ƙungiyar ƙwallon ƙafa ta Juventus ta sallami mai horarwarta Maurizio Sarri bayan kakar wasa ɗaya kacal.
Sarri ya jagoranci Juventus lashe kofin Serie A na tara a jere amma Lyon ta cire su daga Champions League a zagayen 'yan 16 a daren Juma'a.
Juve ce ta cinye wasan da ci 2-1 a birnin Turin amma Lyon ce ta yi gaba sakamakon ƙwallon da ta zira a gidan Juve.
Sarri ɗan Italiya mai shekara 61, an naɗa shi ne kan yarjejeniyar shekara uku bayan ya shekara ɗaya a Chelsea.
