Buhari: 'Ba na yin barci a bakin aiki'
Asalin hoton, Facebook/Nigeria Presidency
Shugaban Najeriya Muhammadu Buhari ya mayar da martani ga Bishop na Yola Stephen Mamza wanda ya ce ci gaba da kashe-kashen da ake yi a kasar wata manuniya ce ga "yadda shugaban yake barci a bakin aikinsa."
Shugaban ya mayar da martanin ne ta bakin babban mai taimaka masa a fannin yada labarai Malam Garba Shehu a ranar Litinin.
A lokacin wa'azinsa na bikin Easter, Bishop Mamza, ya soki gwamnatin Buhari kan yadda ta kasa kawo karshen kashe-kashe da satar mutane don neman kudin fansa.
Garba Shehu ya wallafa a shafinsa na Facebook cewa Babban Limamin Katolika na Yola bai yi ya Shugaba Buhari adalci ba, inda ya ce "an samu ci gaba sosai a shekaru uku zuwa hudu da suka gabata a ciki da wajen garin Yola."
Ya ci gaba da cewa:"Wannan ci gaban da aka samu ba zai yiwu ba, idan da a ce shugaban bacci yake yi."
Babu karin bayanai
Ci gaba da duba FacebookBBC ba za ta dauki alhakin abubuwan da wasu shafukan daban suka wallafa ba.Karshen labarin da aka sa a Facebook
Ya ce "kimainin 'yan gudun hijira 400,000 da ke samun mafaka a Adamawa yanzu sun koma Borno - abin da ya sa aka samu dimbin fitowar masu kada kuri'a a yankin Arewa maso Gabas lokacin zabe."
Har ila yau ya ce: "Bayan garin Yola, garuruwan Michika da Madagali da Mubi wadanda a baya suke karkashin ikon Boko Haram, tuni suka dawo hannun dakarun sojin Najeriya."
A karshe Malam Garba Shehu ya ce "yankin Arewa maso Gabashin kasar ya samu ci gaba fiye da yadda yake a lokacin gwamnatin baya."
