Kalli hotunan zanga-zangar da Kiristoci suka yi a Jos
Daruruwan Kiristoci sun yi zanga-zanga a birnin Jos na jihar Filato ,domin nuna rashin jin dadinsu game da kashe-kashen da aka yi a wadansu kauyukan jihar.
Masu zanga-zanga da suka sanya bakaken tufafi sun bazu a titunan birnin dauke da kwalayen wadanda aka rubuta sakonni iri daban-daban.
Shugabannin al'umma a yankin da lamarin ya faru sun ce rikicin ya yi sanadiyyar "mutuwar mutum fiye da 200, amma 'yan sanda a jihar sun ce mutum 86 ne aka kashe."
Wadansu kwalayen na dauke da sakonnin da ke kira ga Shugaban Amurka Donald Trump da ya kawo musu dauki.
A ranar Laraba ne Shugaba Muhammadu Buhari ya yi ganawar sirri da Shugaban Majalisar Dattawan kasar Bukola Saraki da na Majalisar Wakilai Yakubu Dogara game da batun, kwana guda bayan ya kai ziyara jihar.
