Newcastle ta yi waje da Arsenal daga Carabao Cup

Lokacin karatu: Minti 2

Newcastle ta kai zagayen karshe a Carabao Cup na bana, bayan da ta doke Arsenal 2-0 a St James' Park a wasa na biyu da suka kara ranar Laraba.

Kenan Newcastle ta yi waje da Gunners a kofin bana da cin 4-0 gida da waje a karawa biyun da suka yi.

A wasan farko zagayen daf da karshe da aka yi a Emirates cikin Janairu, Newcastle ce ta ci 2-0, inda Alexander Isak da kuma Anthony Gordon suka ci mata ƙwallaye.

Minti na 19 da fara wasa ne Neewcastle ta jefa ƙwallo a ragar Gunners ta hannun Jacob Murphy, haka suka je hutu ana cin Arsenal 1-0.

Kenan Murphy ya ci ƙwallo biyar a dukkan fafatawa a kakar nan - yana da hannu a zura 14 a raga a kakar nan bayan biyar da ya ci ya kuma bayar da tara aka zura a raga.

Kakar da ya ci ƙwallaye da yawa ita ce 2016/17 lokacin da yake Norwich, wanda ya ci 10 ya bayar da shida aka zura a raga.

Wannan shi ne wasa na uku da suka kece raini a tsakaninsu a kakar nan, bayan da aka ci Gunners 1-0 cikin Nuwambar 2024 a St James's Park a Premier League.

Arsenal ta yi ban kwana da FA Cup a kakar nan, wanda Manchester United ta fitar da ita da kuma Carabao Cup.

Skip Wanda aka fi karantawa and continue reading
Wanda aka fi karantawa

End of Wanda aka fi karantawa

Kofin da ke gaban Arsenal ya rage na Premier League, wanda take ta biyu a teburi, kuma kaka 21 rabonda ta lashe kofin.

Haka kuma Gunners ta kai zagaye na biyu kai tsaye a Champions League, kofin da ba ta taɓa ɗauka ba.

Wannan koma baya ne ga kociyan Arsenal, Mikel Arteta, wanda FA Cup kaɗai ya ɗauka a Gunners a 2020 lokacin korona tun bayan da ya karbi aikin.

Ranar Lahadi 18 ga watan Mayu Arsenal za ta karɓi bakuncin Newcastle a Emirates a Premier League, wasa na huɗu da za su kara a tsakaninsu a bana.

Da wannan sakamakon Arsenal za ta je Leicester City, domin buga Premier League ranar Asabar 15 ga watan Fabrairu a wasan gaba.

Daga nan Gunners za ta karɓi bakuncin West Ham a karawar hamayya ranar Asabar 22 ga watan Fabrairu a Emirates.

Ita kuwa Newcastle za ta je Birmingham ranar Asabar 8 ga watan Fabrairu a FA Cup daga nan ta je Manchester City a Premier League ranar Asabar 15 ga watan Fabrairu.