Ƙwallon da Valverde ya ci Man City ce mafi ƙayatarwa a Champions League

Hukumar ƙwallon kafa ta Turai, Uefa ta zaɓi ƙwallon da Valverde ya ci Manchester City a matakin mafi ƙayatarwa a Champions League a 2023/24.

Ya zura ƙwallon ne a karawar zagayen quarter finals a wasan farko a Santiago Bernabeu ranar Talata 9 ga watan Afirilun 2024.

Masu gudanar da zaɓen wadanda suka yi bajinta a gasar ta zakarun Turai da aka kammala, sun ce ƙwallo na uku da ya ci da ta kai an tashi 3-3 ba wadda ta kamo ta a ƙayatarwa.

Haka kuma akwai biyu daga cikin 10 masu ƙayatarwa da ƴan wasan Real Madrid ne suka zura a raga a kakar nan.

Akwai ƙwallon da Rodrygo ya ci Napoli a wasa na biyar a cikin rukuni na uku da Real Madrid ta ja ragama zuwa zagaye na biyu.

Sai kuma ƙwallon da Bellingham ya zura a raga a dai karawa da ƙungiyar Italiya a karawar da aka yi a filin Diego Armando Maradona.

Real Madrid ta lashe Champions League na bana na 15 jimilla ranar Asabar a Wembley, bayan da ta doke Borussia Dortmund 2-0.

Wasan karshe na 18 da ƙungiyar Sifaniya ta buga kenan da ɗaukar Champions League na 15 kakar nan, wadda ba wata ƙungiyar da ta kamo Real a yawan ɗaukar kofin.

Dortmund ta sa ran lashe Champions League na biyu a tarihi a karo na uku da ta kai wasan karshe a gasar zakarun Turai.

Kuma karon farko da suka fafata a wasan karshe a gasar, amma na 15 da suka kece raini a tsakaninsu, inda Real ta ci wasa bakwai da canjaras biyar, Dortmunt ta yi nasara uku.

Wannan shi ne wasan karshe na biyu da Dortmund aka doke ta a Wembley, bayan da Bayern Munich ta yi nasara a 2013.