Qatar 2022: Netherlands ta kori Amurka daga Kofin Duniya

Netherlands ta tsallake rijiya da baya zuwa zagayen semi fayinal a Gasar Kofin Duniya yayin wasan kwata fayinal tsakaninta da Amurka, inda ta cinye wasan da 3-1.

Tawagar mai horarawa Louis van Gaal ta kai hari cikin nasara a minti na 10 da take wasa lokacin da Memphis Depay ya ci ƙwallon da Denzel Dumfries ya bugo masa.

Netherlands ta sake jefa ƙwallo a raga ana dab da tafiya hutun rabin lokaci, wadda Daley Blind ya ci.

Amurka ta matsa wa Netherlands tun bayan da ta farke ɗaya a minti na 76 da ƙwallon da Haji Wright ya jefa a ragarta.

Ba a tashi daga wasan ba sai da Dumfries ya zira ta uku a ragar Amurka.

Sakamakon na nufin Amurka ta zama ƙasa ta farko da ta fita daga gasar a zagayen kwaf ɗaya.

Argentina za ta fafata da Australiya a ɗaya wasan da za a yi a filin wasa na Al Rayyan da ke Qatar.