ભારત સાથેનો '2+2 ડાયલૉગ' યુએસએ મુલતવી રાખ્યો

ભારત અને યુએસ વચ્ચે જુલાઈના પ્રથમ સપ્તાહમાં યોજાનાર '2+2 ડાયલૉગ' યુએસ દ્વારા મુલતવી રાખવામાં આવ્યો છે.

વિદેશ મંત્રાલયના પ્રવક્તા રવીશ કુમારે ટ્વીટ કર્યું હતુ કે, યુએસ સેક્રેટરી પોમ્પીઓએ વિદેશમંત્રી સુષમા સ્વરાજને કહ્યુ હતુ કે યુએસ ભારત સાથેનો 2+2 ડાયલૉગ અનિવાર્ય કારણોસર મુલતવી કરે છે.

જો કે રવીશ કુમારના આ ટ્વીટ બાદ ટ્વિટર પર લોકોની પ્રતિક્રિયા આવવાની શરૂ થઈ ગઈ હતી.

'બીજી વખત 2+2 ડાયલૉગ મુલતવી કરાયો'

ઉલ્લેખનીય છે કે, ભારત તથા યુએસ વચ્ચે આગામી 6ઠ્ઠી જુલાઈએ '2+2 ડાયલૉગ'નું આયોજન થનાર હતું, જેમાં બન્ને દેશોના સુરક્ષા સંબંધોને મજબૂત કરવા અંગે તથા વૈશ્વિક વ્યૂહરચના અંગે ચર્ચા થવાની શક્યતા હતી.

આ સિવાયના પ્રાદેશિક અને વૈશ્વિક મુદ્દાઓ પર પણ ચર્ચા થનાર હતી.

આ કાર્યક્રમમાં ભારત તરફથી વિદેશ મંત્રી સુષમા સ્વરાજ અને રક્ષા મંત્રી નિર્મલા સિતારામન તથા યુએ તરફથી સેક્રેટરી ઑફ સ્ટેટ માઇક પૉમ્પીઓ તથા સેક્રેટરી ઑફ ડિફેન્સ જેમ્સ મેટીસ ભાગ લેવાના હતાં.

તમે આ વાંચ્યું કે નહીં?

આ પહેલી વખત નથી બન્યું કે, ભારત અને યુએસ વચ્ચેનો 2+2 ડાયલૉગ મુલતવી કરાયો હોય. અગાઉ 18 એપ્રિલ 2018ના રોજ આ ડાયલૉગનું આયોજન થનાર હતું. એ વખતે પણ 2+2 ડાયલૉગ મુલતવી રહ્યો હતો.

બન્ને દેશો વચ્ચે 2+2 ડાયલૉગ કરવાનો નિર્ણય 25-26 જૂન 2017ના રોજ વડા પ્રધાન મોદીની વૉશિંગ્ટન ડીસીની મુલાકાત દરમિયન લેવાયો હતો.

બગડેલા સંબંધોના કારણે કાર્યક્રમ મુલતવી કરાયો?

ભારતના વડા પ્રધાન મોદી અને અમેરિકાના રાષ્ટ્રપતિ ટ્રમ્પ દ્વારા આ કાર્યક્રમ અંગે સંમતિ સધાઈ હોવા છતાં આ કાર્યક્રમ કેમ મુલતવી થઈ રહ્યો છે? આ પ્રશ્ન વિદેશ મંત્રાલયના પ્રવક્તા રવીશ કુમાર દ્વારા ટ્વીટ કરાયા બાદ ચર્ચાઈ રહ્યો છે.

ઉલ્લેખનીય છે કે, જ્યારે આ કાર્યક્રમ યુએસ દ્વારા રદ કરવામાં આવ્યો છે ત્યારે ભારત અને યુએસ વચ્ચેના સંબંધો પહેલાં જેટલા સારા નથી.

ઈરાન પાસેથી ક્રૂડ ઓઇલની આયાત કરવા મુદ્દે તાજેતરમાં જ યુએસ અને ભારત વચ્ચેના સંબંધો વણસ્યા હતા. યુએસની નારાજગી છતાં ભારતે ઈરાન સાથેની પોતાની નીતિ યથાવત રાખી હતી.

આ સાથે રશિયા પાસે એસ-400 મિસાઇલ ડિફેન્સ સિસ્ટમ ખરીદવાની તૈયારી ભારતે દર્શાવી છે.

નિષ્ણાંતોનું માનવું છે કે 2+2 ડાયલૉગમાં રશિયા તથા ઈરાન આ બન્ને મુદ્દાઓ પર ચર્ચાઓ થવાની શક્યતા હતી. ઈરાન અને રશિયા મુદ્દે યુએસ-ભારતના સંબંધો બગડ્યા છે, જેના કારણે જ યુએસએ આ ડાયલૉગ મુલતવી રાખ્યો હોવાનું શક્ય છે.

ઉલ્લેખનીય છે કે, રવીશ કુમારે ટ્વીટમાં એવું પણ જણાવ્યુ છે કે, યુએસ સેક્રેટરીએ આગામી દિવસોમાં આ ડાયલૉગ ક્યારે યોજવો તેની નવી તારીખો નક્કી કરવાની તૈયારી દર્શાવી હતી. હવે 2+2 ડાયલૉગ ભારતમાં યોજવો કે યુએસમાં એ અંગે પણ નિર્ણય લેવાશે.

તમે અમને ફેસબુક, ઇન્સ્ટાગ્રામ, યુટ્યૂબ અને ટ્વિટર પર ફોલો કરી શકો છો