શા માટે સુપ્રીમે કઠુઆ ગેંગરેપ કેસ પઠાણકોટ ટ્રાન્સફર કર્યો?

સુપ્રીમ કોર્ટે સોમવારના રોજ કઠુઆ ગેંગરેપ અને હત્યા કેસને પંજાબના પઠાણકોટ ટ્રાન્સફર કર્યો છે.

સમાચાર એજન્સી પીટીઆઈ મુજબ, મુખ્ય ન્યાયાધીશ દીપક મિશ્રાની અધ્યક્ષતાવાળી બેન્ચે કહ્યું કે આ કેસની સુનાવણી ફાસ્ટ ટ્રેક કોર્ટમાં બંધ રૂમની અંદર નિયમિત ધોરણે નિર્ધારિત સમયમર્યાદામાં હાથ ધરવામાં આવે.

સુપ્રીમ કોર્ટે એવું પણ કહ્યું કે કેસની સુનાવણી જમ્મુ-કશ્મીરમાં લાગું રણબીર પિનલ કોડ અંતર્ગત હાથ ધરવામાં આવશે.

જમ્મુ-કશ્મીરના અમૂક કાયદાઓ ભારતના કેન્દ્રીય કાયદાઓ કરતાં અલગ છે.

જાન્યુઆરી મહિનામાં જમ્મુના કઠુઆમાં એક સગીર બાળકી સાથે ગેંગરેપ કરી તેની હત્યા કરી દેવામાં આવી હતી. આ મામલે દેશભરમાં ભારે પ્રદર્શનો થયાં હતાં.

સુપ્રીમ કોર્ટે પીડિત પરીવાર, તેમની સાથે જોડાયેલા લોકો અને તેમનાં વકીલની સુરક્ષા નિયમિત રાખવાનો પણ આદેશ કર્યો છે.

આ સાથે જ સુપ્રીમ કોર્ટે કેસ સાથે સંબંધિત દસ્તાવેજોને ઉર્દૂમાંથી અંગ્રેજીમાં અનુવાદ કરવા અંગે કહ્યું છે. કોર્ટે એવું પણ કહ્યું છે કે સગીર આરોપીને આપવામાં આવેલી સુરક્ષા જાળવી રાખવામાં આવે.

પરિવારની આશા

સુપ્રીમ કોર્ટના આદેશ બાદ પીડિત પરિવારે આશા વ્યક્ત કરી છે કે તેમને ન્યાય મળશે.

સ્થાનિક પત્રકાર માજિદ જહાંગીર સાથે વાતચીતમાં પીડિતાનાં પિતાએ કહ્યું, "અમને આશા છે કે નિષ્પક્ષ સુનાવણી થશે. અમને ખુશી છે કે બીજા રાજ્યમાં સુનાવણી હાથ ધરાશે."

પિતાએ કહ્યું, "ક્રાઇમ-બ્રાન્ચે સંતોષજનક રીતે તપાસ કરી છે. અમે માત્ર ન્યાયની માગ કરી રહ્યા છીએ."

સુપ્રીમ કોર્ટના ચુકાદા અંગે ખુશી વ્યક્ત કરતા પીડિત પરિવારના વકીલ દીપિકાસિંહ રાજાવતે કહ્યું, "કેસ ટ્રાન્સફર થતા હું ખુશ છું. આ અમારો વિજય છે."

આરોપીઓએ કેસને જમ્મુ ટ્રાન્સફર કરવાની તથા સીબીઆઈ દ્વારા તપાસ કરાવવાની માગ કરી હતી. જેને સર્વોચ્ચ અદાલતે ફગાવી દીધી હતી.

તમે આ વાંચ્યું કે નહીં?

સુનાવણી જુલાઈમાં

ઉનાળું વેકેશન બાદ સુપ્રીમ કોર્ટ ફરીથી ખૂલશે ત્યારે આ કેસ મામલે આગળની સુનાવણી હાથ ધરવામાં આવશે.

કઠુઆ ગેંગરેપ અને હત્યા મામલે સમગ્ર દેશમાં ભારે વિરોધ પ્રદર્શનો થયાં હતાં. સાથે જ આંતરરાષ્ટ્રીય સ્તરે પણ પીડિતાને ન્યાય મળે એવી માંગણી ઊઠી હતી.

કેસના મૂળમાં એક આઠ વર્ષની મુસ્લિમ ગુર્જર સમુદાયની સગીરા છે. જેમનું દસ જાન્યુઆરીના રોજ અપહરણ કરવામાં આવ્યું હતું. એક સપ્તાહ બાદ પીડિતાનો મૃતદેહ જંગલમાંથી મળી આવ્યો હતો.

સુપ્રીમ કોર્ટે આ પહેલાં કઠુઆ ગેંગરેપ મામલે સુનાવણીમાં કહ્યું હતું કે અદાલત આ કેસ મામલે નિષ્પક્ષ અને યોગ્ય સુનાવણી પ્રત્યે ગંભીર છે.

પીડિતાના પિતાએ ભયને સુપ્રીમ કોર્ટમાં આ કેસની સુનાવણી કઠુઆથી બહાર સ્થળાંતર કરવાની માગ કરી હતી.

જ્યારે, આરોપીઓ તરફથી કેસની સુનાવણી જમ્મુમાં અને સીબીઆઈ દ્વારા તપાસ હાથ ધરવામાં આવે એવા મતલબની અરજી સુપ્રીમ કોર્ટમાં દાખલ કરી હતી.

કેમ ટ્રાન્સફર થયો મામલો?

સામાન્ય રીતે, જ્યારે પીડિત પરીવાર પોતાના જીવ પર જોખમ અને અદાલતી કાર્યવાહીમાં વિક્ષેપ થવાનો ભય અનુભવે, ત્યારે તેઓ સુનાવણીને કોઈ બીજી જગ્યાએ સ્થળાંતર કરવાની માગ કરે છે.

કોર્ટની કાર્યવાહીને કોઈપણ જાતના દબાણથી મુક્ત રાખવા માટે પણ સુનાવણી સ્થાનાંતરિત કરવામાં આવે છે.

ઉદાહરણ તરીકે ગુજરાતના ચર્ચિત સોહરાબુદ્દીન શેખ એન્કાઉન્ટર મામલાની સુનાવણી મુંબઈમાં થઈ રહી છે. કારણ કે ગુજરાતમાં સુનાવણીને પ્રભાવિત કરવાની આશંકા સેવવામાં આવી હતી.

સુપ્રીમ કોર્ટના વરિષ્ઠ વકીલ આલોક કુમાર જણાવે છે કે, "કોઈપણ કેસ એક જિલ્લાથી બીજા જિલ્લામાં અથવા તો એક રાજ્યથી બીજા રાજ્યમાં ત્યારે જ ટ્રાન્સફર કરવામાં આવે છે, જ્યારે અદાલતને લાગે કે જ્યાં સુનાવણી ચાલી રહી છે ત્યાં હસ્તક્ષેપ થવાની આશંકા છે."

મોટેભાગે પીડિત પક્ષ સુપ્રીમ કોર્ટ પાસેથી કેસ ટ્રાન્સફર કરવાની માગણી કરતા હોય છે અને સુપ્રીમ કોર્ટ કેસને એવા નિષ્પક્ષ સ્થળે સ્થળાંતર કરી આપે છે જ્યાં આરોપી પક્ષ કાર્યવાહીમાં કોઈ વિક્ષેપ ન કરી શકે.

ચર્ચિત નીતિશ કટારા હત્યાકાંડ મામલે સુપ્રીમ કોર્ટે સુનાવણી ગાઝિયાબાદથી દિલ્હી ટ્રાન્સફર કર્યો હતો. પંજાબનો ચર્ચિત ડીજીપી કેપીએસ ગિલ મામલાને પણ સુપ્રીમ કોર્ટે પંજાબમાંથી બહાર દિલ્હીમાં ટ્રાન્સફર કર્યો હતો.

આલોક કુમાર કહે છે, "મોટેભાગે પીડિત પક્ષ કેસને ટ્રાન્સફર કરવાની અરજી કરતાં હોય છે. પરંતુ ક્યારેક એજન્સી પણ આવું કરી શકે છે. ઉદાહરણ તરીકે સીબીઆઈએ લાલુ પ્રસાદ યાદવ મામલાને બિહારથી બહાર ટ્રાન્સફર કરવાની માગણી કરી હતી કારણ કે એજન્સીને એવું લાગતું હતું કે બિહારમાં લાલુ તપાસને પ્રભાવિત કરી શકે છે."

અત્યાર સુધી કેસમાં શું થયું?

તમે અમને ફેસબુક, ઇન્સ્ટાગ્રામ, યુટ્યૂબ અને ટ્વિટર પર ફોલો કરી શકો છો