Rooney avuga ko Pochettino yaba umutoza 'ukwiye' Manchester United, Ole Gunnar adahawe akazi gahoraho
Ahavuye isanamu, Getty Images
Wayne Rooney yavuze ko umutoza Mauricio Pochettino wa Tottenham yaba umutoza "ukwiye" Manchester United mu gihe iyi kipe yaba idahaye akazi gahoraho Ole Gunnar Solskjaer kuri ubu uyitoza by'inzibacyuho.
Rooney ni we ufite umuhigo wo kuba yaratsindiye ibitego byinshi Manchester United n'ikipe y'igihugu y'Ubwongereza kurusha abandi.
Amakuru yakomeje kuvuga ko bishoboka ko Pochettino ashobora guhabwa akazi gahoraho ko gutoza Manchester United.
Solskjaer wakinanye na Rooney muri Manchester United, yabaye umutoza w'inzibacyuho w'iyi kipe guhera mu kwezi kwa cumi na kabiri k'umwaka ushize wa 2018, ikaba itaratsindwa mu mikino 10 amaze kuyitoza.
Rooney yabwiye televiziyo CNN ati: "Byaba ari byiza kubona Ole Gunnar akomeje n'ibi bihe byiza ikipe irimo akaba yanagira amahirwe yo kuyitoza mu buryo buhoraho".
"Ariko bidashobotse, ikipe igashaka guhitamo mu bandi batoza, muri icyo gihe ntekereza ko Pochettino yaba ari we ukwiye".
Pochettino ni we wahabwaga amahirwe menshi yo kuba yaba umutoza wa Manchester United ubwo Jose Mourinho yirukanwaga mu kwezi kwa cumi na kabiri k'umwaka ushize wa 2018.
Ahavuye isanamu, Getty Images
Ariko Umunya- Norvège Solskjaer w'imyaka 45 y'amavuko, wanakiniye iyi kipe inshuro 364, yasimbuye Umunya-Argentine Pochettino w'imyaka 46 y'amavuko, mu bahabwa amahirwe yo gukomeza gutoza iyi kipe mu buryo buhoraho nyuma yo kwitwara neza mu mikino amaze kuyitoza muri iki gihe cy'izibacyuho.
United imaze kubona amanota 22 mu mikino umunani ya shampiyona itozwa na Solskjaer, mu gihe yari imaze kubona amanota 26 mu mikino 17 yatojwe na Mourinho muri uyu mwaka w'imikino.
Kandi iyi kipe iri no mu mikino y'icyiciro cya gatanu mu gikombe cya FA Cup nyuma yo gutsinda Arsenal mu cyiciro cya kane.
