Jose Mourinho avuga ko 'imikino ibiri ya gicuti yakiniye iwayo' ari yo yagobotse Manchester City
Ahavuye isanamu, Getty Images
Umutoza Jose Mourinho wa Manchester United avuga ko imyiteguro ya Manchester City y'umukino wahuje amakipe yombi ku cyumweru Manchester City ikawutsinda, yafashijwe no gukina imikino "ya gicuti" mu cyumweru cyabanje.
Manchester City yongeye gusubira ku mwanya wa mbere by'agateganyo muri shampiyona ya Premier League nyuma yaho ibitego bya David Silva, Sergio Aguero na Ilkay Gundogan biyifashije kubona amanota atatu y'uwo mukino waberaga ku kibuga cyayo cya Etihad.
Ni umukino warangiye Manchester City itsinze Manchester United ibitego 3-1.
Ariko Mourinho yavuze ko Manchester City yafashijwe n'imikino ibiri ibanza yakiniye kuri icyo kibuga.
Yavuze ko iyo mikino ya Manchester City - itsinda Southampton na Shakhtar Donetsk ku giteranyo cy'ibitego byose hamwe 12 kuri 1 - yayitsinze biyoroheye kurusha iyo Manchester United yo iheruka gukina.
Uyu wari umukino wa wa gatatu wikurikiranya Manchester United ikinnye yasuye, nyuma yo gutsinda Bournemouth mu mpera y'icyumweru cyabanje na nyuma yo gutsinda Juventus ku wa gatatu ushize.
Mourinho yabwiye ikiganiro cya BBC Radio 5 live ati:
"Tubabajwe n'ibyavuye mu mukino mu gihe ikipe yari yitanze, ikipe yakinnye imikino itatu iyikinira hanze mu cyumweru kimwe, harimo umukino ukomeye cyane wa Juventus, mu gihe indi kipe [Manchester City] yo yakinnye imikino ibiri ya gicuti ikayikinira ku kibuga cyayo ikina na Southampton na Shakhtar".
Ahavuye isanamu, Getty Images
Yongeyeho ati:
"Kunanirwa k'umubiri no kunanirwa ko mu mutwe bitera gukora amakosa. Bari bananiwe ku mubiri no mu mutwe. Byagusaba kuba ukina umupira w'amaguru cyangwa undi mukino wo ku rwego rwo hejuru kugira ngo ibi ubashe kubyumva".
Igitego kimwe cya Manchester United cyinjijwe kuri penaliti na Anthony Martial, nyuma y'ikosa umunyezamu Ederson yari akoreye kuri Romelu Lukaku.
Umutoza Pep Guardiola wa Manchetser City yabwiye BBC Sport ko ikipe ye yari "ikwiye iyi ntsinzi".
Yagize ati:
"Mu gice cya mbere, twakinnye dufite ubwoba gacye...mu gice cya kabiri, umukino wari ufunguye gacye nuko tubona umwanya urushijeho wo gukina, nuko dukina neza dukina n'ikipe yo ku rwego rwo hejuru".
