Argentine mu mayirabiri y'igikombe c'isi yose
Ahavuye isanamu, Getty Images
Umugwi wo mu gihugu ca Argentine muri Amerika yo mu bumanuko igeze mu mayirabiri aho amahigwe yo kuja mw'ihiganwa ry'igikombe c'isi yose mu Burusiya mu mwaka uza asigaye ku rushi.
Amajonjora yo muri Amerika yo mu bumanuko mu gikombe c'isi yose, niyo ya mbere arimwo amahinyu, mu gihe ata rukino ruba rworoshe.
Imigwi ine niyo yonyene yemerewe kuja mw'ihiganwa ry'igikombe c'isi yose, hagashobora kuboneka n'uwa gatanu mu majonjora y'ibibanza biba bisigaye.
Argentine imaze gutwara igikombe c'isi yose kabiri mu 1978 no mu 1986 iri mu kibanza ca gatandatu, ikaba isigaje urukino rumwe gusa.
Mu gihe yoba itsinzwe, umugwi wa Lionel Messi woba usezeranye n'iryo higanwa.
Umugwi wa Brésil uri mu kibanza ca mbere muri Amerika y'ubumanuko, niwo wa mbere umaze gutwara kenshi ihiganwa ry'isi yose mu 2002, 1994, 1970, 1962 no mu 1958.
Imigwi ikurikirta ifise ibikombe vyinshi mw'iryo higanwa ni Ubutaliyano hamwe n'Ubudagi, imaze gutwara ico gikombe incuro zine zine.
Ku munsi wa gatatu niho Argentine izokina urukino rushobora gutuma iva mu mayirabiri ihura n'igihugu ca Equateur.
Mu gihe yoba itsinze izoca ija mu majonjora y'ibibanza birenga, igashobora kuronka itike yo kuja mu Burusiya mu mwaka uza.
Ni yaramuka inganije izotegerezwa kurindira ngwirabe ko hari abo irusha amanota izindi nkino zarangiye, naye ni yatsindwa izoba isezeye.
