Abahinzi bahingaga nk'ibimasa bahawe imfashanyo
Bamwe mu bahinzi bo mu majyepfo ya Ethiopia babonye imfashanyo itanzwe n'abaturage bo mu gihugu no hanze yacyo, nyuma yuko za videwo zihererekanyijwe cyane zibagaragaza bakora akazi k'ikimasa ko guhinga.
Bari barapfushije inka zabo kubera amapfa (izuba ryinshi) akomeje kubaho mu bihugu byo mu karere k'Ihembe ry'Afurika.
Kuva aho BBC itangarije mu kwezi kwa kane inkuru yo guhinga kwabo, aba bahinzi bo mu karere ka Taltalle mu gace ka Borena, kazwiho korora inka, bamaze kubona imfashanyo.
Tura Bobba yabwiye BBC ati: "Ubu turiruhukije nyuma yuko tubonye ibimasa. Nahawe ibimasa bibiri".
Kende Boru, undi muhinzi, na we yabonye imfashanyo. Yagize ati: "Rwose twahinze nk'ibimasa kuko nta mahitamo twari dufite".
Aba bahinzi bombi bavuze ko ibimasa bahawe bikiri amashashi (bikiri bitoya) kandi ko barimo kubitoza kugira ngo bizamenye guhinga imirima.
Abbe Tokkichaw, utangaza ibiganiro kuri YouTube, ari na we wafashije mu kubasabira iyo mfashanyo, yabwiye BBC ko yashoboye kugeza ibimasa 58 ku bahinzi 29.
Umuryango w'abibumbye (ONU/UN) wavuze ko ayo mapfa, ya mbere mabi cyane mu yabayeho mu myaka 40 ishize, amaze kwica inka zirenga miliyoni 1.5 muri Ethiopia, anatuma abantu 200,000 basuhuka (bajya gushakishiriza ahandi) bataye ingo zabo.
