China – Taiwan: Beijing iri gukora indi myiyereko ya gisirikare hafi y'iki kirwa
Ahavuye isanamu, Getty Images
Igisirikare cy'Ubushinwa kivuga ko gikomeje imyiyereko ya gisirikare ikomeye mu nkengero za Taiwan, mu gihe mbere cyari cyavuze ko iyi myiyereko, irimo no kurasa, yarangiye ku cyumweru.
Ubuyobozi bw'akarere k'uburasirazuba k'ingabo z'Ubushinwa bwavuze ko bwimenyereza ibitero byo kurasa intwaro zisenya amato (ubwato) agenda munsi y'inyanja hamwe n'ibitero byo mu nyanja.
Imyiyereko ya mbere yaho y'iminsi ine, yari iyo gusubiza ku ruzinduko rw'umukuru w'inteko ishingamategeko y'Amerika Nancy Pelosi wasuye icyo kirwa (izinga mu Kirundi) mu cyumweru gishize.
Taiwan yashinje Ubushinwa gukoresha iyo myiyereko nko kwimenyereza igitero kuri iki kirwa.
Kuri uyu wa mbere, Taiwan yavuze ko indege z'Ubushinwa n'amato yabwo bitari byinjiye mu mazi yo ku butaka bwayo - agera mu ntera ya kilometero 22 uvuye ku nkombe - mu myiyereko yo kugeza ubu.
Amerika, hamwe na Australia n'Ubuyapani, byamaganye iyo myiyereko, bivuga ko intego yayo ari uguhindura uko ibintu bisanzwe bimeze mu bunigo bwa Taiwan - ubu bukaba ari agace k'amazi gafite ubugari bwa kilometero 180 kari hagati y'ubutaka n'iki kirwa nyirizina.
Muri iyi myiyereko, indege n'amato by'Ubushinwa byakomeje kugenda birenga umurongo wo hagati na hagati muri ubwo bunigo.
Ariko ku wa mbere minisiteri y'ingabo za Taiwan yavuze ko uwo murongo wo hagati na hagati wari uhagarariye ubwumvikane buteruye bwari buriho kuva mu myaka ya 1950 kandi ko kubaho kwawo ari "ikintu gifitiwe gihamya".
Amerika yanamaganye Ubushinwa kubera guhagarika ubufatanye n'Amerika mu nzego zitandukanye zirimo n'imihindagurikire y'ikirere, mu kwihimura ku ruzinduko rwa Pelosi.
Ubushinwa bubona Taiwan nk'intara yabwikuyeho bushobora kwisubiza ku ngufu, bibaye ngombwa.
Ariko Taiwan ni ikirwa cyitegeka cyibona ko nta ho gihuriye n'Ubushinwa.
Ariko iyo abategetsi b'ibihugu bikomeye ku isi babaye nk'aberura bavuga ibyo, birakaza cyane Ubushinwa.
Ahavuye isanamu, Getty Images
Uku kubura kw'igikorwa cya gisirikare ku nkengero za Taiwan kubaye nyuma yuko abategetsi b'Ubushinwa b'ibijyanye n'inyanja batangaje ko imyiyereko izanabera mu bindi bice.
Mu nyanja y'umuhondo (Yellow Sea/Mer Jaune) - iri hagati y'Ubushinwa n'umwigimbakirwa wa Koreya - byari biteganyijwe ko indi myiyereko ya gisirikare itangira ku wa gatandatu kugeza hagati muri uku kwezi kwa munani, ikabamo n'imyitozo yo kurasa.
Kuri ibyo, hiyongeraho igikorwa cya gisirikare giteganyijwe kumara ukwezi cyo mu gace kamwe k'inyanja ya Bohai - mu majyaruguru y'inyanja y'umuhondo - cyatangiye ku wa gatandatu.
No kuri uyu wa mbere, Ubushinwa bwatangaje imyiyereko irimo kurasa ibera ku nkengero y'inyanja yo mu majyepfo y'Ubushinwa (South China Sea).
Ubushinwa na Taiwan: Iby'ibanze
- Kuki Ubushinwa na Taiwan bifitanye umubano mubi? Ubushinwa na Taiwan byatandukanyijwe mu gihe cy'intambara yo gusubiranamo kw'abaturage yo mu myaka ya 1940, ariko Ubushinwa bushimangira ko icyo kirwa hari igihe kizagera bukacyisubiza, no ku ngufu bibaye ngombwa
- Taiwan itegetswe gute? Iki kirwa gifite itegekonshinga ryacyo, abategetsi batowe binyuze mu buryo bwa demokarasi, ndetse gifite ingabo zigizwe n'abasirikare hafi 300,000
- Ni nde wemera Taiwan? Ibihugu bicyeya gusa ni byo byemera Taiwan. Byinshi ahubwo byemera leta y'Ubushinwa. Amerika nta mubano uzwi ifitanye na Taiwan, ariko ifite itegeko riyisaba guha icyo kirwa ubushobozi bwo kwirinda ubwacyo.
