Nta gishya cyasezeranyijwe kuri misile za Ukraine nyuma y'ibiganiro bya Starmer na Biden

Inyandiko gusa
Minisitiri w'intebe w'Ubwongereza Sir Keir Starmer (iburyo) na Minisitiri w'ububanyi n'amahanga w'Ubwongereza David Lammy (wa kabiri iburyo), mu nama na Perezida w'Amerika Joe Biden (hagati ibumoso), mu cyumba kizwi nka Blue Room cyo mu biro bya White House, i Washington DC. Ifoto yo ku wa gatanu, ku itariki ya 13 Nzeri (9), mu 2024.

Ahavuye isanamu, PA Media

Insiguro y'isanamu, Minisitiri w'intebe w'Ubwongereza Sir Keir Starmer (iburyo) na Minisitiri w'ububanyi n'amahanga w'Ubwongereza David Lammy (wa kabiri iburyo), mu nama na Perezida w'Amerika Joe Biden (hagati ibumoso), mu cyumba kizwi nka Blue Room cyo mu biro bya White House, i Washington DC, ku wa gatanu
    • Umwanditsi, Malu Cursino
    • Igikorwa, BBC News

Minisitiri w'intebe w'Ubwongereza Sir Keir Starmer nta kimenyetso yatanze ko hari icyemezo na kimwe cyafashwe cyo kwemerera Ukraine gukoresha misile zirasa mu ntera ndende mu kurasa imbere mu Burusiya, nyuma y'ibiganiro yagiranye na Perezida w'Amerika Joe Biden i Washington.

Abajijwe niba yumvishije Biden kwemerera Ukraine kurasa ibisasu bya misile bigeza kure byo mu bwoko bwa Storm Shadow imbere mu Burusiya, Sir Keir yavuze ko bagiranye "ikiganiro kirekire kandi cy'ingirakamaro ku ngingo nyinshi, zirimo Ukraine, nkuko wabyitega, ku burasirazuba bwo hagati no ku karere k'inyanja y'Abahinde n'inyanja ya Pasifika".

Ibiro bya perezida w'Amerika (bizwi nka White House) byavuze ko byanagaragaje "guhangayikishwa cyane na Iran na Koreya ya Ruguru birimo guha Uburusiya intwaro zica".

Mbere, Perezida w'Uburusiya Vladimir Putin yaburiye ibihugu byo mu burengerazuba bw'isi kutemerera Ukraine kurasa misile zigeza kure ku Burusiya.

Skip content and continue reading

End of content

Putin yavuze ko icyemezo nk'icyo cyaba ari "uruhare rutaziguye" rw'umuryango wo gutabarana w'Uburayi n'Amerika (OTAN) mu ntambara yo muri Ukraine.

Ariko Kurt Volker, wahoze ari intumwa yihariye y'Amerika mu biganiro bya Ukraine, yabwiye ikiganiro Today cya BBC cyo kuri radio ko amagambo ya Perezida w'Uburusiya agamije kubuza uburengerazuba kugira ikindi gikorwa bukora.

Yagize ati: "Impamvu Putin avuga biriya bintu ni ukugira ngo agere ku musaruro wo kutubuza kugira ibyo dukora – atari ukuvuga ko hari icyo byahindura na kimwe ku byo azakora mu by'ukuri cyangwa ku byo atekereza mu by'ukuri."

Avuga ku mpaka zijyanye na misile ziraswa mu ntera ndende, Volker yavuze ko Amerika "ikabya [mu] kumva ko uyu ari umurongo utukura [ntarengwa] mushya wuko ibi byashotora cyane Uburusiya bigatuma hari ukuntu ibintu bifata indi ntera".

Skip Ibisomwa cane and continue reading
Ibisomwa cane

End of Ibisomwa cane

Aganira n'abanyamakuru mbere yo guhura na Minisitiri w'intebe Sir Keir muri White House, Biden yagize ati: "Sintekereza cyane kuri Vladimir Putin."

Kugeza ubu, Amerika n'Ubwongereza ntibiraha Ukraine uruhushya rwo gukoresha misile zirasa kure, mu kurasa imbere mu Burusiya, kubera ubwoba ko ibyo byatuma ibintu bifata indi ntera.

Ariko Perezida wa Ukraine Volodymyr Zelensky yakomeje gusaba inshuti za Ukraine zo mu burengerazuba kuyemerera gukoresha izo ntwaro gutyo, avuga ko ari bwo buryo bwonyine bwo kurangiza iyi ntambara.

Kuva Uburusiya bwagaba igitero gisesuye kuri Ukraine muri Gashyantare (2) mu mwaka wa 2022, imijyi yo muri Ukraine hamwe n'imirongo y'imbere yo ku rugamba byakomeje kuraswaho ibisasu buri munsi n'Uburusiya.