Turukiya yahagaritse ubucuruzi na Israel kubera 'amakuba' muri Gaza

Turukiya yahagaritse ubucuruzi bwose yakoranaga na Israel kubera igitero cyayo muri Gaza, ivuga ko "amakuba ajyanye n'imibereho arimo kuba mabi kurushaho" muri Gaza.

Minisiteri y'ubucuruzi ya Turukiya yavuze ko izo ngamba zizakomeza gukurikizwa kugeza Israel yemeye ko imfashanyo igera muri Gaza "mu buryo budahagarara kandi buhagije".

Mu mwaka ushize, ubucuruzi hagati y'ibi bihugu bwari bufite agaciro kagera hafi kuri miliyari zirindwi (7) z'amadolari y'Amerika.

Minisitiri w'ububanyi n'amahanga wa Israel yashinje Perezida wa Turukiya Recep Tayyip Erdogan gukora nk'"umunyagitugu".

Minisitiri w'ububanyi n'amahanga wa Israel, Israel Katz, yatangaje ku rubuga nkoranyambaga X ko Erdogan arimo "kwirengagiza inyungu z'Abanyaturukiya n'abacuruzi b'Abanyaturukiya ndetse akirengagiza n'amasezerano mpuzamahanga agenga ubucuruzi".

Yongeyeho ko yategetse iyo minisiteri ayobora gushaka ubundi buryo bwo kuziba icyuho cy'ubucuruzi na Turukiya, ikibanda ku musaruro w'imbere mu gihugu no ku bicuruzwa bitumizwa mu bindi bihugu.

Minisitiri w'ubucuruzi wa Turukiya Omer Bolat yanenze "imyitwarire yo kutava ku izima" ya Israel ku bijyanye n'agahenge, hamwe n'uko ibintu bimeze ku bijyanye n'imibereho mu mujyi wa Rafah wo mu majyepfo ya Gaza.

Yagize ati: "Turukiya yahagaritse ibicuruzwa byose yohereza n'ibyo itumiza muri Israel kugeza hashyizweho agahenge gahoraho ndetse n'imfashanyo ikemererwa kugera muri Gaza mu buryo budahagarara."

Mu 1949, Turukiya yabaye igihugu cya mbere cyiganjemo abayisilamu cyemeye leta ya Israel. Ariko mu myaka ibarirwa muri za mirongo yo mu gihe cya vuba aha gishize, umubano hagati y'ibihugu byombi warushijeho kuba mubi.

Mu 2010, Turukiya yacanye umubano wa dipolomasi na Israel, nyuma yuko impirimbanyi 10 z'Abanyaturukiya zishyigikiye Palestine ziciwe mu gukozanyaho n'abasirikare bo mu mutwe kabuhariwe wa Israel, binjiye mu bwato bwa Turukiya bwageragezaga kumenera mu ruzitiro rwa Israel mu nyanja kuri Gaza.

Umubano wasubiyeho mu 2016, ariko imyaka ibiri nyuma yaho ibihugu byombi byirukanye abadipolomate bo ku rwego rwo hejuru kuri buri gihugu, mu bushyamirane bushingiye ku kuba Israel yarishe Abanye-Palestine mu myigaragambyo ku mupaka wa Gaza na Israel.

Erdogan yakomeje kurushaho kunenga Israel kuva Hamas yagaba igitero cyiciwemo abantu muri Israel cyo ku itariki ya 7 Ukwakira (10) mu 2023.

Yakomeje kunenga Minisitiri w'intebe wa Israel Benjamin Netanyahu, amugereranya n'abategetsi babayeho mbere ku isi nka Adolf Hitler mu Budage, Benito Mussolini mu Butaliyani na Joseph Stalin mu Bumwe bw'Abasoviyeti, yita Netanyahu "umubazi [kubaga] wa Gaza".

Netanyahu yavuze ko Perezida wa Turukiya ari we muntu wa nyuma mu bashobora guha Israel amasomo y'imyitwarire myiza.

Muri Werurwe (3) uyu mwaka, yavuze ko Perezida Erdogan "ashyigikiye abicanyi bibasira imbaga ba Hamas banafata abagore ku ngufu, ahakana jenoside y'Abanya-Armenia [ndetse] yica aba Kurdes bo mu gihugu cye".

Hashize amezi Perezida Erdogan ari ku gitutu cya politiki muri Turukiya ngo afatire ingamba Israel, igututu kiva ku batavuga rumwe na we no ku bamushyigikiye.