Huw Edwards ari mu bitaro nyuma yuko atangajwe mu kibazo cya BBC

Huw Edwards ari mu bitaro kubera "ibibazo bikomeye by'ubuzima bwo mu mutwe", nkuko umugore we abivuga, ni nyuma yuko kandi uyu mugore we avuze ko umugabo we ari we munyamakuru wa BBC urimo gushinjwa.

Umugore we Vicky Flind yavuze ko asohoye itangazo mu izina ry'umugabo we nyuma y'iminsi hari uguhwihwisa, avuga ko arisohoye "ahanini kubera impungenge ku buzima bwe bwo mu mutwe no mu rwego rwo kurinda abana bacu".

Ikinyamakuru the Sun cyo mu Bwongereza cyatangaje ko yarishye umuntu w'urubyiruko kugira ngo amuhe amashusho yerekana igitsina.

Polisi y'Ubwongereza ivuga ko Edwards, w'imyaka 61, nta kintu na kimwe azakorwaho na polisi.

Itangazo ry'umuryango we ryavuze ko uwo munyamakuru ashaka gusubiza we ubwe ku byo ashinjwa igihe azaba amaze kumera neza bihagije.

Iryo tangazo rigira riti: "Kubera ibiherutse gutangazwa bijyanye n''umunyamakuru wa BBC' ntangaje iri tangazo mu izina ry'umugabo wanjye Huw Edwards, nyuma y'iminsi itanu igoye cyane ku muryango wacu.

"Nkoze ibi ahanini kubera impungenge ku buzima bwe bwo mu mutwe no mu rwego rwo kurinda abana bacu.

"Huw arwaye ibibazo bikomeye by'ubuzima bwo mu mutwe. Nkuko bifitiwe gihamya, mu myaka ya vuba aha ishize yavuwe kugira agahinda gakabije.

"Ibyabaye mu minsi micye ishize byahuhuye ibintu, yongeye kurwara bikomeye ndetse ubu arimo kwitabwaho mu bitaro aho azaguma igihe kirekire".

'Nta cyaha cyakozwe'

Muri iryo tangazo ryasohowe rinyujijwe mu biro ntaramakuru PA News byo mu Bwongereza, umugore we yavuze ko yizeye ko uko kwemeza ko ari Edwards bizasoza guhwihwisa (gushyirwa mu majwi) ku banyamakuru ba BBC badafite aho bahuriye n'ibyo ashinjwa.

Yavuze ko umugabo we "yabwiwe bwa mbere ku wa kane w'icyumweru gishize ko hari ibyo ashinjwa".

Iryo tangazo ryasabye abantu kubaha ubuzima bwite bw'umuryango we, ndetse umugore we yavuze ko bifitiwe gihamya muri rubanda ko mbere Edwards yari yararwaye kugira ibibazo by'ubuzima bwo mu mutwe.

Habura iminota ngo iryo tangazo ry'umuryango ritangazwe, andi makuru yatangajwe na polisi y'Ubwongereza, yari irimo gusuzuma ibyo yashinjwe mu minsi ya vuba ishize nyuma yuko igiranye ibiganiro n'abayobozi bakuru ba BBC.

Yagize iti: "Abapolisi bo mu buyobozi bw'itsinda rifite ubumenyi bwihariye ku gutahura icyaha ubu basoje isuzuma ryabo kandi basanze nta makuru ahari agaragaza ko hari icyaha cyakozwe.

"Mu kugera kuri iki cyemezo, bavuganye n'impande nyinshi zirimo na BBC n'uvugwa ko yahohotewe, n'umuryango w'uvugwa ko yahohotewe, bombi bikozwe n'urundi rwego rwa polisi".

Polisi yavuze ko abapolisi "bazi ibyatangajwe mu bitangazamakuru ku bindi bishinjwa uwo muntu umwe" ariko ko polisi "nta makuru asobanura neza cyangwa amakuru kuri ibi ashinjwa [ifite]... kandi kubera iyo mpamvu nta cyo polisi ibikoraho kugeza ubu".

BBC yavuze ko izakomeza "amaperereza yo kumenya ibyabaye" kuri ibyo uwo munyamakuru ashinjwa. Iryo perereza ryari ryabaye rihagaritswe ku busabe bwa polisi y'Ubwongereza mu gihe yari irimo ikora amaperereza yayo bwite.

Umuvugizi wa BBC yagize ati: "Ubu tugiye gukomeza n'uwo murimo, hubahirizwa imikorere iboneye n'isuzuma ryimbitse ry'ibyabaye, ari na ko hakomeza kubaho kuzirikana inshingano yacu yo kwita ku bo bireba bose".

Mu butumwa bwa 'email' umuyobozi mukuru wa BBC Tim Davie yoherereje abakozi bayo, yavuze ko "ibi biracyari ibintu by'urusobe cyane".

Yavuze ko itangazo ry'umuryango "ni icyibutsa ko iminsi micye ishize yashyize ku karubanda ubuzima bwite bw'abantu", yongeraho ati: "Mu izingiro ry'ibi hari abantu n'imiryango yabo.

"Nta gushidikanya ko iki kizaba igihe kigoye kuri benshi nyuma y'iminsi micye ishize igoye. Ndashaka kubizeza ko ikiduhangayikishije aka kanya ari inshingano yacu yo kwita ku bo bireba bose".

Edwards yatangiye gukorera BBC hagati mu myaka ya za 80 (1980), atangira ari umunyamakuru wimenyereza umwuga, agera ku kuba umwe mu banyamakuru bazwi cyane kuri BBC News.

Hamwe no gutangaza amakuru ya Ten O'Clock News kuri televiziyo, yayoboye gutangaza amakuru akomeye, nk'amatora n'urupfu rw'Umwamikazi Elizabeth II.

Ibyo yashinjwe mu ntangiriro, byatangajwe bwa mbere n'ikinyamakuru the Sun ku wa gatanu w'icyumweru gishize, byari uko uwo munyamakuru yarishye umuntu w'urubyiruko ngo amuhe amashusho agaragaza igitsina, ibyo bigatangira kuva ubwo uwo muntu w'urubyiruko yari afite imyaka 17.

Uwahaye amakuru icyo kinyamakuru ni nyina w'uwo muntu w'urubyiruko hamwe n'umugabo w'uwo mugore ariko utari se w'uwo muntu - ariko ibaruwa yasohowe mu izina ry'uwo muntu, yasohowe n'umunyamategeko we, yavuze ko ibyo bavuze ari "ubucucu".

Mbere, polisi ikorera i South Wales mu Bwongereza yavuze ko yari yamenyesheje umuryango w'uwo muntu w'urubyiruko ko nta kintu kibi cy'icyaha cyakozwe, nyuma yuko uwo muryango uyigannye mbere yo gutanga ikirego ku buyobozi bwa BBC no kubibwira ikinyamakuru the Sun.

Mu rindi tangazo ryo ku wa gatatu, polisi yavuze ko mu gihe cya vuba gishize yakoze andi maperereza kandi ko yasanze "nta gihamya ko hari icyaha na kimwe cyakozwe".

Ku wa kabiri, BBC yatangaje iperereza nyuma yo kuvugana n'umuntu uri mu kigero cy'imyaka ya za 20 wavuze ko yohererejwe ubutumwa butukana kandi butera ubwoba avuga ko yohererejwe n'uwo munyamakuru.

Nuko ikinyamakuru the Sun gitangaza indi nkuru ivuga ko uwo munyamakuru yarenze ku mategeko yo muri gahunda ya guma mu rugo mu gihe cya Covid mu kwezi kwa Gashyantare (2) mu 2021 akajya guhura n'umuntu w'imyaka 23 yari yahuriye na we ku rubuga rwa internet rwo guteretaniraho, ndetse akohereza ibyo uwo muntu yise ubutumwa "bwotsa igitutu cyane".

Icyo kinyamakuru cyanatangaje icyo kivuga ko ari ikiganiro (chat) cyo kuri Instagram hagati y'uwo munyamakuru n'umuntu w'imyaka 17, aho uwo munyamakuru yohereje ubutumwa burimo na 'emojis' z'umutima z'urukundo.

BBC ntiyashoboye kugenzura ubu butumwa.

Umuvugizi w'ikinyamakuru the Sun yavuze ko nta gahunda gifite yo gutangaza ibindi byo gushinja Edwards kandi ko kizakorana n'iperereza rya BBC.

Itangazo ry'uwo muvugizi rigira riti: "Ibyo ashinjwa byatangajwe na the Sun buri gihe byari bikomeye cyane. Ibindi ashinjwa bikomeye byaragaragaye mu minsi micye ishize...

"The Sun izakorana n'iperereza rya BBC. Tuzaha itsinda rya BBC amakuru y'ibanga hari ibyavanwemo [ibyakuwemo] akubiyemo ibyo ashinjwa bikomeye kandi by'ingeri nyinshi twakiriye, birimo na bimwe twahawe n'abakozi ba BBC".

Itangazo rya the Sun ryavuze ko nta cyaha ryashinje Edwards mu nkuru yacyo ya mbere cyatangaje ku rupapuro rubanza.

Iki kinyamakuru cyari cyatangaje ko Edwards yarishye umuntu kugira ngo amuhe amafoto ubwo uwo muntu yari afite imyaka 17 - ariko nticyasobanuye ko ibyo bikorwa bishobora kuba icyaha.

Abantu bafite munsi y'imyaka 18 bari mu cyiciro cy'abana mu mategeko agenga amafoto agaragaza igitsina.

Iyi iri hejuru ugereranyije n'imyaka yemewe umuntu ashobora kwemerera undi gukorana na we imibonano mpuzabitsina (kugira ngo ntibifatwe ko yayikoreshejwe ku ngufu), yo ni imyaka 16.

Mu byo cyatangaje nyuma yaho kuri iyo nkuru, ikinyamakuru the Sun cyahinduye imyandikire y'igishinjwa uwo munyamakuru, kiba "byumvikana ko kuvugana hagati y'aba babiri byatangiye ubwo uyu muntu w'urubyiruko yari afite imyaka 17".

Nubwo ibyo ashinjwa byagiye ku karubanda ndetse bikavugwaho cyane, ibitangazamakuru - birimo na BBC News - mbere byari byafashe icyemezo cyo kudatangaza izina ry'uyu munyamakuru kubera impungenge ku kuvogera ubuzima bwite bwe.